22°C , Partly cloudy | Kigali-Rwanda
Abafite inganda zenga ibitoki bagaragaje ibibazo byo kutagira ibyo bapfunyikamo (Foto James)

Abafite inganda zenga ibitoki bafite ikibazo cyo kubona ibyo bapfunyikamo

Yanditswe na MUGISHA BENIGNE

Ku ya 08-07-2018 saa 15:14:04

Abafite inganda zenga urwagwa rw’ibitoki n’imitobe batangaza ko ikibazo kibakomereye ari ukubona ibyo bapfunyikamo ibicuruzwa byabo, hagendewe ku mabwiriza mashya  y’ubuziranenge.

Abafite inganda zenga ibitoki bagaragaje ibibazo byo kutagira ibyo bapfunyikamo (Foto James)

Bamwe mu bari bitabiriye inama yabahuje n’Ikigo k’igihugu gishinzwe ubushakashatsi n’iterambere ry’inganda (NIRDA) baganiriye n’Imvaho Nshya bayitangarije ko bafite ikibazo kibakomeye cyo kubona amacupa y’ibirahuri bapfunyikamo urwagwa benga ndetse n’imitobe kuko babujijwe kongera gupfunyika mu macupa ya pulasitiki, dore ko yangiza ibidukikije, nk’uko amabwiriza y’ibidukikije abivuga.

Bavuga kandi ko banihanangirijwe gupfunyika mu macupa y’izindi zonga yakoreshejwe uretse amacupa y’uruganda kandi akoze mu kirahuri.

Munyaneza Alfred, ni umuhuzabikorwa wa Koperative yenga urwagwa ya Mutenderi, yagaragaje ko kubona icyo bapfunyikamo urwagwa benga ari imwe mu mbogamizi bafite kuko babujijwe gupfunyika mu macupa ya pulasitiki ari yo bari basanzwe bakoresha, ayo basabwa gupfunyikamo akaba ahenze cyane, ni mu gihe badashobora kuzamura igiciro cy’urwagwa batinya ko abakiriya babo babacika bakajya kugurira ahandi.

Ati “Koperative yacu imaze igihe kitari gito yenga urwagwa rw’ibitoki ikanarucuza, ariko muri iyi minsi dufite imbogamizi zo kubona icyo dupfunyikamo urwagwa rwacu kuko amacupa ya pulasitiki atakemewe kandi ayo dusabwa nayo arahenze”.

Kankwanzi Anastasie, ufite uruganda rwenga urwagwa mu Karere ka Kirehe, avuga ko ari umwe mu bamaze kubaka umushinga we no kuwushyira mu bikorwa, afite imashini akoresha mu kwenga ibitoki n’izindi zimufasha gutara urwagwa ariko ngo imbogamizi afite ikomeye ni ukubona ibyo arupfunyikamo.

Avuga ko kutagira ibipfunyikwamo urwagwa bituma atabasha gukwirakwiza urwagwa rwe, bityo umusaruro wabo ntugere kuri benshi bitewe n’uko amacupa bagura mu nganda ahenze cyane.

Ati “Icupa rimwe ku ruganda hariya i Masoro ni amafaranga 230, reba rero niba ushaka kujyana ku isoko amakaziye menshi cyangwa amacupa menshi hirya no hino mu gihugu, ntibidukundira”.

Avuga ko aramutse abonye ibyo apfunyikamo urwagwa, yagera no ku isoko rya Kigali ndetse no hanze y’igihugu kuko ibicuruzwa bye abyizeye kandi bikunzwe ku isoko.

Asanga Leta ibashije gufasha abenga urwagwa kubona ibyo bapfunyikamo byakongerera inganda inyungu zirenze izo zabonaga, ahasigaye nazo zigasabwa ibindi zishoboye zikabishyira mu bikorwa.

Abajijwe niba yarakemuye ikibazo k’ibirango by’ubuziranenge kuko byagaragaye ko inyinshi zitarabibona, Kankwanzi yavuze ko yatangiye inzira igana ku buziranenge, akaba amaze gusurwa inshuro ebyiri n’Ikigo k’igihugu gitsura ubuziranenge, akaba yaratanze ibyo yasabwaga byose, akaba ategereje igisubizo cya nyuma cyo kwemererwa guhabwa ikirango cya S Mark.

Ati “Inzira igana ubuziranenge yo narayitangiye kandi nyigeze kure, maze gusurwa kabiri na RSB, ntegereje igisubizo cya nyuma cyo guhabwa cyangwa kwimwa ikirango cya S Mark”.

Kampeta Sayinzoga, Umuyobozi mukuru wa NIRDA, yongeye kwibutsa abafite inganda z’ibitoki ko kizira kikaziririzwa gupfunyika urwagwa mu icupa rya Pulasitiki, ko bagomba gukora ibishoboka bakabona ayo macupa y’ibirahuri basabwa bakabona kujyana ibicuruzwa byabo ku isoko.

TANGA IGITEKEREZO

Leave a Reply

Be the First to Comment!

avatar