18°C , Mostly cloudy | Kigali-Rwanda

Abafite amazina mu muziki biganje muri 20 bakomeje mu irushanwa “Next Pop Star”

Yanditswe na GISUBIZO Gentil M.

Ku ya 23-11-2020 saa 22:05:03
Marina ari mu bahanzwe amaso muri iri rushanwa rigeze ahakomeye

Irushanwa “Next Pop Star” riri kuba ku nshuro ya mbere mu Rwanda, rigeze aharyo aho 20 biganjemo ab’amazina asanzwe amenyerewe muri muzika nyarwanda bakomeje mu kiciro kibanziriza icya nyuma.

Abahanzi 60 bahataniraga imyanya 20 mu irushanwa rya  “The Next Popular Star”, bari bamaze iminsi batorwa binyuze kuri murandasi mbere y’uko bisozwa mu ijoro ryo ku wa  18 Ugushyingo 2020.

Abahatana 20 babashije gukomeza mu kiciro gikurikira batangajwe ku Cyumweru tariki 22 Ugushyingo 2020 nyuma yo guteranya amajwi yavuye ku rubuga rwa “Igihe” n’ay’abatoye bakoresheje ubutumwa bugufi.

Amajwi y’abatoreye kuri “Internet” afite 40% mu gihe abakoresheje ubutumwa bugufi bo bafite 60%.

Unyujije amaso mu bahanzi 20 babashije kubona itike yo gukomeza usangamo benshi basanzwe bamenyerewe mu ruhando rw’imyidagaduro.

Abahanzi babashije gukomeza barimo Hirwa Irakoze Honorine, Sammy Yvon Uwikunda wamenyekanye cyane muri Symphony Band, Nyatanyi Tuyisenge David, Kibatega Jasmine, Yannick Gashiramanga, Mahoro Ines, Muhirwa Issa uzwi nka Maylo umwe mu baraperi bakomeye bo mu Karere ka Musanze.

Harimo kandi Ish Kevin usanzwe uzwi mu muziki, Eric Ntwari, Marina ubarizwa muri The Mane, Rwamukwaya Theo Blaise, Cyubahiro Serge uzwi muri Neptunez Band, Bampire Joi, Gisa CyInganzo, Kivumbi, Mubiligi Allelua Pierrine, Kenny Kshot, Milly, Cyiza Jackson na Gihozo Credo Santos.

Umuyobozi Mukuru wa SM1 Music Group/Sony Music Group, Clay Dustin, aherutse gutangaza ko abazatsinda biyongereye bakaba babiri, uwa mbere azahabwa miliyoni 50 Frw n’amasezerano y’imikoranire n’iyi sosiyete mu gihe uzaba uwa kabiri azahabwa amasezerano y’imikoranire gusa.

Umuyobozi Mukuru w’Ikigo “More Events”, Dushime Christian mu kiganiro n’abanyamakuru avuga ko kuba irushanwa ryarabaye mu gihe  cya COVID-19 ari imwe mu mbogamizi yabayeho ikomeye kuri bo, yongeraho ko nta muhanzi wakagize impungenge izo arizo zose kuko buri kimwe giteguye ngo irushanwa rigende neza.

Ati : “Hari byinshi turi gutegura. Nyuma y’uko Sony yemeye kuzafasha umuhanzi wa kabiri turi kuganira ngo turebe ko hari ubufasha yazahabwa na we. Abahatanye ntibakagombye kugira impungenge, miriyoni 50 Frw ntabwo ari amafaranga twaje gutagaguza, turashaka umunyempano ubikwiye kandi tuzabigeraho, tumufashe agere kure.”

Aba  bahanzi 20 bakomeje muri iri rushanwa binjiye mu kiciro cyo kuririmbira imbere y’akanama nkemurampaka kagomba kuzahuza amajwi bazaba bafite mu gutorwa n’ubuhanga bwabo.

Nyuma hazatoranywa abahanzi 10 na bo bazatoranwamo abandi batandatu bazavamo babiri ba mbere. Harateganywa ko aba batandatu bazaba bageze mu kiciro cya nyuma na bo hari ishimwe bashobora kugenerwa ariko ntabwo biremezwa neza.

Gisa Cyinganzo udashidikanywaho ku miririmbire nawe ari mu bahanzi 20 basigaye bahataniye iri rushanwa

Kivumbi umwe mu baraperi bari kwigaragara neza yakomeje muri 20

Umwanditsi:

GISUBIZO Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.