21°C , Partly sunny | Kigali-Rwanda
Abadepite mu biganiro na MINICOM (Foto; Niyonsenga S)

Abadepite basabye abakora ibikorwa by’inyungu rusange gukurikiza amategeko

Yanditswe na NIYONSENGA SCHADRACK

Ku ya 04-01-2018 saa 08:00:39

Ubwo abadepite bagize Komisiyo y’ubukungu n’ubucuruzi bari mu gikorwa cyo gusuzuma umushinga w’itegeko rihindura kandi ryuzuza itegeko nº 21/2011 ryo ku wa 23 Kamena 2011 rigenga amashanyarazi mu Rwanda, hagarutswe ku mikorere ya bamwe mu bashinzwe gukwirakwiza amashanyarazi bagenda bangiza bimwe mu bikorwa by’abaturage nta cyo bitayeho basabwa kwikosora.

Abadepite mu biganiro na MINICOM (Foto; Niyonsenga S)

Abadepite basabye Urwego rw’Igihugu ngenzuramikorere rw‘imirimo ifitiye iguhugu akamaro (RURA) na Minisiteri y’Ibikorwa Remezo (MININFRA) kujya bakurikirana abakozi babo na ba rwiyemezamirimo babo bakabibutsa kubahiriza amategeko mu gihe bageze mu bikorwa by’abaturage.

Nk’uko byasobanuwe n’umwe mu badepite witanzeho urugero, yavuze ko ubwe byamubayeho igihe na we yari afite ibikorwa ahagombaga kunyuzwa amashanyarazi maze yaza agasanga ibiti bye babitemaguye mu buryo atari azi ndetse yashaka no kubabaza impamvu bakamubwira nabi bishingikirije ko ibyo bakoze ari k’uburenganzira bahabwa n’itegeko ryo gukwirakwiza amashanyarazi mu gihugu.

Uwo mudepite yagize ati “Ndababaza impamvu mwimura abantu mu buryo budakurikije amategeko, abo bashinzwe gutanga amashanyarazi bajya mu bintu by’abantu bagatemagura batanabibabwiye, nta n’inama babigiyeho. Ubundi iyo wimura abantu hakurikijwe itegeko urabanza ukabegera mukajya inama ukabereka icyo ibyo ugiye kubakorera bibafitiyeho inyungu, ukabereka uko ari inyungu rusange.”

Akomeza avuga ku byo yiboneye ubwe, ati “Uko bikorwa kuri ubu ni uko baza ngo kubera ko ari amashanyarazi noneho yaba ari iyo myaka bakajyamo bagatemagura batiriwe bagira icyo babwira nyirabyo ndetse rimwe na rimwe n’inzego z’ibanze ziba zitazi ko abo bantu baje. Rwose ibyo bintu bibabaza abaturage cyane kandi bikwiye guhinduka.”

Depite Bazatoha Adolphe we yasabye ko abakozi bashinzwe gukwirakwiza ibikorwa remezo by’amashanyarazi bakwiye gukurikiza amategeko, agira ati “Ubundi birazwi ko ibikorwa byo kwimura abantu ahantu hashyirwa ibikorwa by’inyungu rusange bifite itegeko ribigenga, ariko icyagaragaye ni uko ahenshi ababikora badakurikiza ayo mategeko yose rimwe na rimwe bagahohotera abantu. Turasaba rero ababishinzwe ngo bakurikirane ba rwiyemezamirimo babikora kugira ngo bage bakurikiza itegeko kandi bubahirize uburenganzira bw’abaturage.”

Mukunde Felicita ushinzwe amategeko n’ubucuruzi muri minisiteri y’ibikorwa remezo yavuze ko icyo itegeko risaba cyo ubwacyo gisobanutse ariko anashimangira ko koko bamwe mu bakozi bashobora kubirengaho mu makosa yabo bwite.

Mukunde  yagize ati “Ubundi basabwa guhuriza hamwe umukuru w’umudugudu, umunyamabanga nshingwabikorwa w’Akagali n’abaturage noneho hakabaho kubara ibiri kuri ubwo butaka bashaka kwimuraho abantu cyangwa ibikorwa by’abantu, ibiciro byo biba bizwi birahari mu turere urugero niba ari igitoki kiri muri Nyamasheke ubwo igiciro kirazwi, niba ari igiti na cyo igiciro cyacyo kirazwi, kuba rero bishobora kuba hari aho bitubahirizwa ni amakosa y’abantu.”

Umuyobozi w’ishami ry’amategeko muri RURA, Kabiru Jacques, na we yasobanuye ko iyo umuturage asanze agaciro kagenewe ibikorwa bye kadakwiye aba yemerewe kubijuririra binyuze mu kwandikira uru rwego, ibyo abadepite barabishimye ariko banemeza ko bidahagije, cyane ko hari bamwe mu baturage baba badafite ubushobozi bwo gusiragira bajurira ndetse rimwe na rimwe hakaba n’ababa bari kujuririra amafaranga make bigatuma bahitamo kubyihorera mu rwego rwo kwanga guta igihe kinini ku mafaranga make.

Kabiru ati “Uyu munsi navuga ko bikorwa neza kuruta uko byakorwaga mbere n’ubwo ibibazo nk’ibyo bitabura ariko dukomeza no kwigisha abakozi kugira ngo barusheho kwitwara neza mu mirima y’abaturage. Aho itegeko ryaziye ubona ko ibintu biri mu murongo nyawo, wenda nta bwo biri shyashya 100% ariko ubona ko itegeko ryatumye bijya mu buryo.”

Kabiru Jacques ari kumwe na Mukunde Felicita mu Nteko ishinga amategeko (Foto; Niyonsenga S)

Mu bindi abadepite basabye RURA na MININFRA harimo no kwita ku bagenagaciro bashyiraho ibiciro by’abagomba guhabwa ingurane mu gihe ibikorwa byabo biri ahagomba kunyuzwa amashanyarazi bitewe n’uko ngo hari aho byagaragaye ko bamwe mu bagenagaciro babogama bakaba bagenera umuturage agaciro katajyanye n’ibyo yatakarije muri ibyo bikorwa.

TANGA IGITEKEREZO

Leave a Reply

Be the First to Comment!

avatar