28°C , Sunny | Kigali-Rwanda

Abadepite banyuzwe n’uko abatangabuhamya mu manza za Jenoside bitabwaho

Yanditswe na Rutayisire Emile

Ku ya 31-07-2019 saa 16:36:41
Minisitiri Busingye Johnston atanga ibisobanuro ku buryo abatangabuhamya bafatwamo mu manza ziregwamo abakoze Jenoside yakorewe Abatutsi (Foto Gisubizo)

Abadepite bagize Komisiyo y’Ubumwe bw’Abanyarwanda, Uburenganzira bwa Muntu no Kurwanya Jenoside banyuzwe n’ibisobanuro bya Minisiteri y’Ubutabera ku bibazo byagaragajwe na Komisiyo y’Igihugu yo kurwanya Jenoside CNLG ku mpungenge ziterwa n’uburyo abatangabuhamya mu manza za Jenoside bafatwa.

Ibisobanuro bya Minisiteri y’Ubutabera ku bibazo byagaragaye ubwo Abadepite basuraga CNLG byatanzwe kuri uyu wa Gatatu, tariki ya 31 Nyakanga 2019.

Perezidante wa Komisiyo y’Ubumwe bw’Abanyarwanda, Uburenganzira bwa Muntu no Kurwanya Jenoside, Mukamana Elisabeth, yavuze ko ibyo bibazo byerekeye abatangabuhamya mu nkiko mu manza ziregwamo abakoze Jenoside yakorewe Abatutsi mu 1994, batagira ubitaho iyo bamaze gutanga ubuhamya, ibyo bikagira ingaruka zijyanye no kuba hari benshi batagishaka gutanga ubwo buhamya kuko batoroherezwa mu ngendo.

Nkusi Faustin, Umuvugizi w’ubushinjacyaha bw’u Rwanda agira icyo avuga kuri icyo kibazo yagize ati “Nta mutangabuhamya wari wabura burundu mu rubanza. Mbere kugira ngo umutangabuhamya aze mu rubanza, itike ndetse n’insimburamubyizi yabihabwaga ari uko ageze aho urubanza rwabereye, bivuze ko yakoraga ibishoboka akishakira itike ariko ibyo yakoresheje byose akabisubizwa.”

Yakomeje avuga ko n’umwe wabuze itike inzego z’ubutabera zamwegereye zimubaza impamvu atabonetse ariko ikibazo kiza gukemuka kuko yaje kuza nyuma kandi urubanza rukaba.

Kuri iyi ngingo Abadepite bavuze ko bifuza ko byajya bikorwa mbere utanga ubuhamya agahabwa tike ndetse agateganyirizwa n’insimburamubyizi mbere aho kuyishakamo kandi hari igihe aba nta bushobozi afite cyangwa akabura uwo yitabaza.

Depite Mukamana yavuze ko iyo abatangabuhamya batabonetse imanza z’abakoze Jenoside zoherejwe mu Rwanda n’ibindi bihugu zitinda kuburanishwa. Mu bisobanuro byatanzwe, Minisitiri w’Ubutabera Busingye Johnston yagize ati “Ibihugu biba bishaka ko abatangabuhamya bajya gutanga ubuhamya mu bihugu byabo turakorana ndetse baza no mu Rwanda bakagaragaza urutonde rw’abo bashaka kugira ngo bage gutanga ubuhamya noneho ubushinjacyaha ndetse n’Igihugu hari uburyo bafashwa kubona ibyangombwa byo kujya hanze.”

Akomeza avuga ko baborohereza uko bagenda, kubaha ababaherekeza bakabagezayo ndetse bakazagarukana, byumvikana ko bisaba imikoranire y’ibihugu byombi kandi ko kugeza ubu hari umubano mwiza nko mu bihugu byose by’i Burayi kandi ko ikibaye cyose kiganirwaho kandi kigakemurwa.

Kuba hari abatanga ubuhamya ntihagire ubitaho bikabatera ihungabana, Umuvugizi w’Ubushinjacyaha bw’u Rwanda Nkusi avuga ko kugeza ubu nta mutangabuhamya uratanga ubuhamya ngo nyuma ahungabane ariko ko aramutse agaragaye inzego z’ubutabera ziriteguye.

Ati “Hari amashami ashinzwe abatangabuhamya bahohotewe ndetse no mu bushinjacyaha no mu nkiko na bo bafite inzego bariteguye. Hagize ugira ikibazo guhita akurikiranwa byakoroha kuko baba bafite nomero za terefoni zitishyurwa bahamagaraho kandi dukorana n’Inzego z’ibanze n’iz’umutekano ku buryo habaye ikibazo cyakemurwa vuba.”

Ikindi cyagaragajwe ni uko abatangabuhamya bagize uruhare muri Jenoside yakorewe Abatutsi mu 1994 bari muri Gereza bashinja bagenzi babo bakoze Jenoside, na bo bakwiye kwitabwaho ku buryo bwihariye.

Mu bisobanuro by’iki kibazo ni uko hari abatangabuhamya bakatiwe n’inkiko kandi batanga ubuhamya muri izo manza ariko ugasanga kuba bari kumwe n’abo bashinja bishobora kugira ingaruka nko kubacunaguza, kubasaba kubashinjura n’ibindi ariko ugasanga hari abantu banga guhindura ukuri bavuze. Nkusi yavuze ko ibyo babibonye kare maze batandukanya abashinja n’abashinjwa ku buryo baba muri Gereza zitandukanye.

Kuba Abadepite baranyuzwe, Perezida wa Komisiyo Mukamana yagize ati “Twanyuzwe, igisigaye nk’uko twagaragarijwe ingamba kandi n’aho bagejeje ni heza kandi batubwiye ko bagiye gukomeza gushyiramo ingufu. Ni byiza rero kuko umukozi mwiza ntavuga ngo birahagije ahubwo ahora agenda afata ingamba kugira ngo n’ibyo akora birusheho kugenda biba byiza.”

Minisitiri Busingye Johnston atanga ibisobanuro ku buryo abatangabuhamya bafatwamo mu manza ziregwamo abakoze Jenoside yakorewe Abatutsi (Foto Gisubizo)

TANGA IGITEKEREZO

Leave a Reply

Your email address will not be published. Required fields are marked *