28°C , Sunny | Kigali-Rwanda

Abadepite banenze UR kugira ibirarane bya miriyari 5 ibereyemo abantu itazi

Yanditswe na Twagira Wilson

Ku ya 11-09-2019 saa 15:34:42
Zimwe mu nyubako za Kaminuza y'u Rwanda, Ishami rya Huye (Ifoto/Kigali Today)

Mu gihe Komisiyo y’imari n’umutungo bya Leta mu nteko Ishinga Amategeko PAC, ikomeje guhamagaza ibigo n’inzego za Leta kugira ngo byisobanure ku micungire y’umutungo wa Leta, ejo hashize ku wa Gatatu, ubuyobozi bwa Kaminuza y’u Rwanda UR, harimo n’abayobozi b’amashami akorera mu Ntara zitandukanye bitabye           iyo komisiyo, banengwa kumara igihe kinini badafite urutonde rw’abo bagomba kwishyura amadeni ya miriyari eshanu zisaga z’amafaranga y’u Rwanda.

Depite Beline Uwineza, umwe mu badepite bagize PAC, anenga abayobozi ba Kaminuza y’u Rwanda ashingiye kuri raporo y’Umugenzuzi Mukuru w’Imari ya Leta, ko nta nyandiko zigaragaza  uko Kaminuza y’u Rwanda izishyura ibirarane bya miriyari zisaga eshanu, cyane ko ngo itanazi abo igomba kwishyura, dore ko ngo biri no mu mwanzuro wari watanzwe n’inteko rusange gukemura ikibazo k’ibyo birarane vuba.

Depite Bakundufite Christine  we ati “Hari n’ibindi bibazo by’uko Kaminuza y’u Rwanda imara imyaka isaga itatu itarishyura rwiyemezamirimo wayikoreye akazi kandi kararangiye,  ikibazo cy’ubukererwe mu kwishyura awabakoreye ni bimwe mu bishobora gutuma akora akazi ke nabi kandi yarasoje akazi.

Usanga ari bimwe mu bidindiza akazi, ugasanga inyemezabwishyu iramara imyaka iri mu biro by’abashinzwe kwishyura yujuje ibyangombwa kandi ntacyabuze. Ni imikorere mibi kuko igihe ntarengwa ngo uwakoze akazi yishyurwe ni amasaha 45 nyuma yo kuzuza dosiye.”

Umuyobozi wa Kaminuza wungirije ushinzwe imari  akaba ari na we mugenga w’ingengo y’imari muri Kaminuza y’u Rwanda Tengera Kayitare Françoise, yabwiye Komisiyo ya PAC ko ari byo koko yemera ko mu bitabo byabo bafite amadeni  asaga miriyari eshanu babereyemo abantu ku giti cyabo n’ibigo bamaze igihe kinini batarishyura, ashingiye ku byo Umugenzuzi Mukuru w’Imari ya Leta yabazaga mu gihe igenzura ryakorwaga niba bafite urutonde rwabo bagomba kwishyura ari nacyo cyari ikibazo kinini, avuga ko bihaye imyaka itatu kuba byakemutse.

Akomeza agira ati “Dukurikije uko ikibazo cyari kimeze mbere kuko byari ibirarane bya miriyari 14, ubu zikaba zigeze kuri eshanu, kuba aho ingengo y’imari ya kaminuza yemerejwe twateguye urutonde rw’abantu n’ibigo tubereyemo ibirarane bya miriyari zisaga eshanu z’amafaranga y’u Rwanda, zari miriyari 14, none ubu zabaye enye, rero twihaye ingengabihe ku buryo kugeza mu mwaka wa 2021 izo miriyari zizaba zishyuwe, ndetse n’iyo ngengabihe izageza icyo gihe tuzayishyikiriza Inteko.”

Perezida wa Komisiyo ya PAC, Ngabitsinze Jean Chrysostome, yasabye abayobozi ba kaminuza gushyikiriza PAC ingegabihe bihaye mu buryo bwanditse ngo babe bakemuye ikibazo k’iyo myenda ya miriyari 5, agaruka kuri bimwe mu bibazo  kaminuza y’u Rwanda ifite birimo bamwe mu bayobozi bayo batabwiza ukuri Inteko, kudakorana mu bwuzuzanye, no kudakorana neza, kutavugana mu kazi bikaba intandaro y’imicungire idahwitse y’umutungo wa Leta kandi nyamara Umugenzuzi Mukuru w’Imari ya Leta aba yarabagiriye inama basabwa gukurikiza.

TANGA IGITEKEREZO

Leave a Reply

Your email address will not be published. Required fields are marked *