19°C , Mostly clear | Kigali-Rwanda
Mukakomeza Donatilla, umucuruzi w’Inyongeramusaruro mu karere ka Nyamagabe ari kwifashisha ikoranabuhanga rishyashya rije kubafasha mu kazi kabo ka buri munsi.

Abacuruzi b’inyongeramusaruro barishimira ikoranabuhanga begerejwe

Yanditswe na Mukagahizi Rose

Ku ya 19-05-2019 saa 17:10:20

Abacuruzi b’inyongeramusaruro baravuga ko ikoranabuhanga begerejwe ryo gukurikira amasomo y’umwuga wabo, rije ari igisubizo mu kurinda ibihombo bya hato na hato baterwaga n’umwanya batakazaga baza gukurikirana amahugurwa i Kigali.

Iryo koranabuhanga bishimira rishingiye ku kubigisha bagahabwa amasomo bataje mu ishuri ngo baze i Kigali cyangwa se ngo basangwe iyo bari.

Umuyobozi w’umushinga Hinga Weze, Daniel Gies yavuze ko iri koranabunga barikesha ‘INNOVE company’ iba Texas mu gihugu cya Leta Zunze Ubumwe z’Amerika aho rije gufasha abavuruzi b’inyongeramusaruro kugira ngo bage babona amasomo bari iwabo.

Yagize ati : “Nk’uko mubizi muzi ko ibigo bisanzwe bihugura abacuruzi b’inyongeramusaruro rimwe na rimwe kenshi bibasanga iwabo cyangwa se bikabasaba kubasanga i Kigali. Ni ibintu bihenze kuko bisaba kwishyura hoteli, kwishyura aho bari buhugurirwe, bisaba kwishyura amafaranga y’ingendo, amacumbi n’ibindi.”

Avuga ko INNOVE yashatse igisubizo, ishaka uburyo abacuruzi b’inyongeramusaruro bajya biga amasomo atandukanye ajyanye n’umwuga wabo kandi bari iwabo.

Ni muri ubwo buryo abacuruzi b’inyongeramusaruro 20 bakorera mu turere 10 Hinga Weze baje guhugurwa ku bintu bijyanye no gucunga ibicuruzwa byabo hifashishijwe ikoranabuhanga aho bifashisha igikoresho kabuhariwe kinjizwamo telefoni ikoresha ‘Android’.

Muri iri koranabuhanga isomo rirategurwa, rigatunganywa neza ndetse hakaba harimo n’imfashanyigisho mu isomo ryo gucunga ububiko, haba hagaragaramo ububiko bw’inyongeramusaruro, hari ibijyanye no kubika no gufata neza inyandiko, izo nyandiko zikagaragara zikerekanwa, haba hagaragara amashusho abyerekana anabisobabura ku buryo umucuruzi w’Inyongeramusaruro ashobora kureba bikamufasha kurushaho kubyumva.

Birangira umucuruzi ashobora gusubiza ibibazo bigaragara muri iyo ‘system’ aho asubiza bikajya bimwereka ko ari byo cyangwa atari byo ndetse bibaye atari byo bikamuha ayandi mahirwe yo kugira ngo yongere yumve neza rya somo abashe gusubiza ibibazo kuko ibibazo by’ingenzi baba babajije ni ibibazo umucuruzi aba yifuzwaho kumenya.

Imiterere y’iri koranabuhanga

Uko iri koranabuhanga rikora, isomo iyo ryatunganyijwe abacuruzi b’inyongeramusaruro bafite amatelefone ya Android ni ukuvuga ngo bazajya babohereza iryo somo noneho we akoreshe email ye ayifungure.

Aba bacuruzi bahawe n’igikoresho kibafasha mu buryo bworoshye bwo kureba iryo somo no kurikurikira hifashishijwe ibikoresho by’ikoranabuhanga ndetse barabitahana aho binjizamo telefone yabo.

Icyo gikoresho gifata neza ku mutwe no mu maso umuntu akamera nk’uri kureba filimi akaba yahagarika igihe ashakiye akanakomeza igihe ashakiye.

INNOVE ifatanyije na Hinga Weze ikaba irimo kubigerageza kugira ngo irebe ko byazagera ku bantu benshi ndetse bigatanga umusaruro.

Mukakomeza Donatilla, umucuruzi w’Inyongeramusaruro mu karere ka Nyamagabe akaba ahagarariye n’abandi bacuruzi bo muri ako karere avuga ko iri koranabuhanga rishyashya rije kubafasha mu kazi kabo ka buri munsi.

Yagize ati : “Rije kudufasha kwibuka amahame n’imirongo ngenderwaho mu bucuruzi bw’inyongeramusaruro by’umwuga mu buryo bw’ikoranabuhanga ku buryo dushobora gukurikira amasomo y’imikoreshereze y’inyongeramusaruro tutavuye aho turi. Twabyishimiye cyane tubimenya tutavuye aho turi ni ukuvuga ngo nshobora kwiga kandi ndi no mukazi bityo, akazi kange ntikadindire kandi n’amafaranga nakagombye gutanga njya mu rugendo n’igihe byose nkabyunguka.”

Mukakomeza Donatilla, umucuruzi w’Inyongeramusaruro mu karere ka Nyamagabe ari kwifashisha ikoranabuhanga rishyashya rije kubafasha mu kazi kabo ka buri munsi.

Yishimira ko gukoresha iri koranabuhanga byoroshye kuko ari ukwifashisha telefone ifite endroid hanyuma bagakurikiza amabwiriza ku buryo ukanda ho amasomo akaza ugakurikira neza nta kibazo ugize.

Yagize ati : “Uretse urugendo rurerure icyo duha agaciro cyane ni igihe kuko gufata iminsi utari mu kazi ntibitanga inyungu.”

Ngabonziza Ange, Umuyobozi wa Koperative y’abacuruzi b’inyongeramusaruro mu karere ka Karongi, akaba umucuruzi w’inyongeramusaruro mu murenge wa Rugabano, Rubengera na Gashari avuga ko iri koranabuhanga rishya rije ari igisubizo kuko ngo bajyaga bava iwabo, bagafata igihe kirekire bagana aho amahugurwa abera, bagata bizinesi zabo none ngo hamwe n’ikoranabuhanga rishyashya bazajya abahugurwa bicaye mu maduka yabo.

Yagize ati : “Ni igisubizo bitewe nuko uburyo dusanzwe twigamo burahenze bigatuma twiga bikeya ariko hamwe n’ikoranabuhanga tuzajya tubasha gukurikirana amasomo menshi cyane ajyanye n’imicungire y’amaduka yacu, uburyo bwo gucunga igishoro, gufata neza abakiliya, imiti mishyashya ndetse n’ibindi byinshi ariko twicaye iwacu mu maduka yacu.”

Muri rusange, abacuruzi b’inyongeramusaruro bashimira Hinga Weze yabatekerejeho kuko ubu buryo bushyashya ngo buzakuraho imbogamizi zabatezaga igihombo igihe bafuze bakaza i Kigali gukurikirana amahugurwa.

Dr Bucagu Charles, Umuyobozi Mukuru wungirije ushinzwe ubuhinzi muri RAB avuga ko kuri ubu nta muntu watera imbere adafite amakuru y’ibyo ashaka cyangwa se adakoresha ikoranabuhanga.

Ikoranabuhanga mu buhinzi n’ubworozi ngo rizorohereza abahinzi borozi kumenya amakuru yizewe kandi ku gihe ndetse naho yakura inama ituma ibyo akeneye yabikora neza.

Hinga Weze ni umushinga watangijwe ku bufatanye n’Ikigo k’Igihugu Gishinzwe Guteza Imbere Ubuhinzi n’Ubworozi (RAB) ku nkunga y’Umuryango w’Abanyamerika wita ku iterambere mpuzamahanga (USAID), ukaba wibanda ku buhinzi no kunoza imirire.

TANGA IGITEKEREZO

Leave a Reply

Your email address will not be published. Required fields are marked *