19°C , Partly cloudy | Kigali-Rwanda

Abacuruza pulasitike zikoreshwa rimwe bahawe amezi abiri yo kuzisezerera

Yanditswe na Mutungirehe Samuel

Ku ya 06-10-2019 saa 14:51:43
Aho banywera amazi hahoraga udukombe twinshi dukoresha rimwe tukajugunywa ariko ntituzongera kugaragara mu Rwanda nyuma y'amezi abiri (Foto Samuel M)

Minisitiri w’Ibidukikije Dr. Biruta Vincent yatangaje ko abacuruza ibikoresho bikoze muri pulasitike ariko bikoreshwa rimwe bikajugunywa, nk’imiheha, udukombe banywesha amazi ahahuriye abantu benshi no mu birori, amasahani n’ibindi, bafite amezi abiri gusa yo kubicuruza bagakoresha uburyo bishira kuko nyuma uzafatwa abicuruza azahanwa n’itegeko rimaze iminsi itageze ku kwezi risohotse.

Minisitiri Biruta yabitangaje kuri uyu wa 6 Ukwakira 2019, ubwo hatangiraga ubukangurambaga bwo gusaba abakibikoresha kubireka, mu rwego rwo kubungabunga ibidukikije. Ni ubukangurambaga bushyigikiwe n’Umuryango w’Ibihugu by’u Burayi (EU), Umujyi wa Kigali na Minisiteri y’Ibidukikije n’abandi bafatanyabikorwa.

Ati: “Buri wese ashobora kugira icyo akora mu buryo bwo kubungabunga ibidukikije ndetse no guhangana n’imihindagurikire y’ibihe. Urugero; ubu murabona imvura y’umuhindo yatangiye kugwa, muri iki gihembwe ni nabwo dutera ibiti. Buri wese azagerageze kongera umubare w’ibiti biri iwe aho atuye. Buri mudugudu ugire umuhigo wo kongera umubare w’ibiti mu mudugudu wawo. Ibyo ngibyo bizaba ari uruhare rukomeye mu guteza imbere ibidukikije ndetse no guhangana n’imihindagurikire y’ibihe.”

Yasobanuye ko itegeko ryo guca ibikoresho bya pulasitike bikoreshwa rimwe ryasohotse bityo abakibicuruza n’ababikoresha bafite amezi abiri gusa yo kubikoresha bigashira mu gihugu.

Ati: “Ikindi mbasaba, ni ukubahiriza amabwiriza n’amategeko atangwa mu buryo bwo kubungabunga ibidukikije; uyu munsi by’umwihariko nagira ngo mbabwire ko itegeko rica izi pulasitike dukoresha inshuro imwe tukajugunya ryasohotse ku itariki ya 23 Nzeri 2019. Dufite amezi abiri kugira ngo ibintu byari mu mangazini, twaguze mu gihe byari byemewe bikoreshwe binacuruzwe, binarangire ariko nyuma yaho uzaba abicuruza, uzaba abikoresha azaba anyuranya n’amategeko.

Utu dukombe twa pulasitike mubona ahantu munywera amazi muri siporo rusange, uyu munsi ntacyo bitwaye ariko buriya guhera ku itariki ya 23 Ugushyingo 2019 nta bwo tuzongera kutubona, ntidukwiye kongera kutubona.”

Minisitiri w’Ibidukikije Dr. Biruta Vincent yabwiye abitabiriye siporo rusange ko ubutaha buri muntu azizanira agacupa ko gushyiramo amazi yo kunywa hagamijwe kurengera ibidukikije (Foto Samuel M)

Minisitiri yasobanuriye Imvaho Nshya ko abacuruzi bamaze kubiteguzwa babizi ariko uzafatwa abicuruza nyuma y’icyo gihe azahanwa.

Ati: “Biravuze ngo nta bindi bizinjira ariko twashyizeho amezi abiri yo kugira ngo abari barabiranguye babifite babashe kubicuruza badahombye, hanyuma ariko nta bandi bazahabwa uruhushya rwo gutumiza ibindi, noneho nyuma y’amezi abiri ni bwo tuzatangira kugenzura ko hari ababa bakibicuruza mu buryo butemewe n’amategeko.

Ibyo bikoresho harimo imiheha, udukombe twa pulasitike, amasahani akoreshwa rimwe, amakanya yayo, harimo ibyo bashyiramo ibyo kurya bakoresha rimwe bakajugunya kandi ariko bikaba ari ibikoresho n’ubundi bishobora gusimburwa n’ibindi kuko nk’utwo dukombe hari ibirahure bisanzwe, hari amacupa abantu bashobora gukoresha bakayatahana. Ibyerekeranye n’ibiyiko n’amasahani n’amakanya birahari n’ubundi bitari ibya pulasitike”.

Yavuze ko bashaka ko biriya bya pulasitiki bikoreshwa rimwe bicika kuko byangiza ibidukikije, bitera umwanda kandi ngo kubigenzura nta bwo ari ibintu byoroshye.

Ambasaderi w’Umuryango w’Ibihugu by’u Burayi mu Rwanda, Nicolas Bellomo, yavuze ko ashimira u Rwanda intambwe rugezeho kuko ari intangarugero mu bindi bihugu mu kwita ku kubungabunga ikirere n’ibidukikije.

Ati: “U Rwanda ni urugero kandi rurimo kuyobora muri uru rugamba rwo kwita ku ihindagurika ry’ibihe no kubungabunga ibidukikije; twishimiye cyane ubu bufatanye n’Umujyi wa Kigali na Minisiteri y’Ibidukikije no muri ubu bukangurambaga bwo kwita ku bidukikije kandi twese twabigiramo uruhare, ubwo ni bwo butumwa bwange.”

Ambasaderi yashimangiye ko urubyiruko rukwiye kubigira ibyarwo kuko ni rwo rushobora kuzahura n’ingaruka z’ihindagurika ry’ibihe mu gihe bititaweho uko bikwiye bityo urugamba ari urwabo kururwana bivuye inyuma bakita ku bidukikije.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.