17°C , Partly sunny | Kigali-Rwanda
Minisitiri w'Intebe, Dr. Ngirente Edouard, uwa kabiri uvuye iburyo, Lt. Col. Asimwe Charles Madudu, ubanza ibumoso, Lt. Col. Ngabo Augustin na Maj. Sumanyi Charles, nyuma yo kurahirira inshingano nshya

Abacamanza mu Nkiko za Gisirikare basabwe kurangwa n’ubunyamwuga

Yanditswe na MUTUNGIREHE SAMUEL

Ku ya 14-09-2018 saa 08:04:43

Minisitiri w’Intebe Dr. Ngirente Edouard yakiriye indahiro z’abacamanza mu Nkiko za Gisirikare, ababwira ko kugira ngo bazabashe kuzuza neza izo nshingano bagomba guhora barangwa n’ibisanzwe biranga Ingabo z’u Rwanda mu bunyamwuga bwazo.

Minisitiri w’Intebe Dr. Ngirente Edouard, uwa gatatu uvuye iburyo, akurikiwe na Minisitiri w’Ingabo Gen. James Kabarebe, Umugaba w’Ingabo Gen. Patrick Nyamvumba ubanza iburyo, bari kumwe n’abacamanza ba Gisirikare barahiriye inshingano nshya (Foto Gisubizo G).

Yabitangaje ejo hashize, tariki ya 13 Nzeri 2018, ubwo yakiraga indahiro z’abacamanza batatu bo mu nkiko za Gisirikare barahiriye inshingano ari bo Lieutenant Colonel Asimwe Charles Madudu, ku mwanya wa Visi-Perezida w’Urukiko rwa Gisirikare, hakaba Lieutenant Colonel Ngabo Augustin na Major Sumanyi Charles, bombi barahiriye kuba abacamanza mu Rukiko Rukuru rwa Gisirikare.

Minisitiri w’Intebe yababwiye ko indahiro bakoze igomba guhora ibaranga kandi igihugu kibifuriza kuzuza neza inshingano nshya bahawe n’ikizere bagiriwe n’ababakuriye zo gutanga ubutabera bunoze.

Ati “Inshingano zanyu murazizi neza; ni ugutanga umusanzu wanyu mu kubaka igihugu kigendera ku mategeko, mugatanga ubutabera bunoze, muharanira ko ubusugire bw’igihugu cyacu n’uburenganzira bwa muntu biba ntavogerwa.

Kugira ngo muzabashe kuzuza neza izo nshingano bimwe mu bigomba guhora bibaranga ni ibisanzwe biranga ingabo z’igihugu cyacu; hari ugukora akazi kanyu kinyamwuga nk’uko bisanzwe, mwubahiriza amategeko. Ibyo turabizi ko bisanzwe bibaranga ariko ni ukubyibukiranya kugira ngo tuzakomeze tubigire umusingi w’akazi dukora.

Kuba inyangamugayo muri byose kandi hose, mugakorera mu mucyo, guhora murangwa n’ikinyabupfura nk’uko bisanzwe, gushishoza mu manza muzajya muca n’ibibazo bizajya bibagezwaho, gukoresha ubutabera bwose ku buryo bushoboka, kwakira neza ababagana no kubaha serivisi nziza, kwirinda ruswa, kuzuzanya n’abo musanze mu mirimo yanyu mukongera imikoranire, gukorera ku gihe mubifashijwemo n’ikoranabuhanga ndetse no guhora mwihugura mu mategeko agenga akazi mumaze gushingwa.”

Abarahiye na bo ntibaca iruhande rw’impanuro za Minisitiri w’Intebe mu nshingano nshya bagiye gukora nk’uko bazisanzwemo.

Lieutenant Colonel Asimwe Charles Madudu, mu kiganiro n’abanyamakuru yagize ati “Akazi k’ubucamanza nta kindi bisaba ni uguca imanza hakurikijwe amategeko. Uwakoze ibyaha akabihanirwa, ndetse n’uwarenganyijwe na we akarenganurwa. Burya ubutabera butinze nta butabera buba burimo, ibyo rero ni byo umuntu agomba kwirinda bwa mbere, tugashyiramo imbaraga zihagije kugira ngo imanza zihute kandi turabizi ko tuzabigeraho nta kibazo.”

Yakomeje avuga ko kugira ngo ibyo bigerweho neza ari ngombwa ko umucamanza ahora yihugura kugira ngo agende ajyana n’uko amategeko agenda ahinduka n’uko ubutabera bugenda butera imbere kugira ngo bazabone ubutabera bubereye Abanyarwanda.

Visi-perezida w’Urukiko rwa gisirikare n’aba bacamanza bemejwe n’inama y’abaminisitiri yateranye ku 11 Nyakanga 2018.

 

TANGA IGITEKEREZO

Leave a Reply

Your email address will not be published. Required fields are marked *