19°C , Partly cloudy | Kigali-Rwanda

Ababyeyi batishoboye bashimiye Leta yabahaye agaciro bakaba baterwa inkunga

Yanditswe na RUTAYISIRE EMILE

Ku ya 16-01-2020 saa 09:24:47
Ababyeyi batwite bicaye n'abana bishimiye ifu bahawe. Inyuma uvuye iburyo, Muhunde Moses akurikiwe na Mbabazi Nadine naho Ishimwe M. Yvonne uwa kabiri uvuye i bumoso

Ababyeyi batwite bari mu kiciro cya mbere n’icya kabiri cy’ubudehe bishimiye ko Leta y’u Rwanda itabatereranye ahubwo ikamenya ibibazo bafite ikorohereza imiryango na za kampani gukorera mu Rwanda nk’abafatanyabikorwa bayo none bakaba bagira uruhare mu gufasha ababyeyi batwite kandi batishoboye.

Ibi ababyeyi babitangarije Imvaho Nshya ku wa 14 Mutarama 2020, ubwo habaga igikorwa cyo guha abo babyeyi batwite  amafu anyuranye y’igikoma, igikorwa cyateguwe n’uruganda rukorera mu Rwanda, Africa Improved Foods (AIF)  rukora ifu irimo uruvangitirane rw’ibinyampeke bitandukanye ikorwamo igikoma rubinyujije mu muryango utari uwa Leta, Jesus Cares For Kids.

Bamwe muri abo babyeyi bahawe iyo fu batangaje ko bishimiye ifu bahawe kuko igiye kubongerera intungamubiri bakenera kugira ngo umwana uri mu nda agire ubuzima bwiza.

Murekatete Jacqueline na Nirere Chantal bavuga ko ifu iziye igihe. Bagira bati “Iyi fu igiye kutugirira akamaro kubera ko ifite intungamubiri umwana aba akeneye ndetse natwe tuba dukeneye kugira ngo tugire ubuzima bwiza”.

Murekatete avuga ko yigeze kugira ikibazo cyo kubyara umwana atarageza igihe cyo kuvuka kandi ko zimwe mu ngaruka zari ukuba atarabonye indyo yuzuye. Agira ati “Kuba tubonye abaterankunga bazajya baduha ifu y’igikoma bizadufasha kuko ifite intungamubiri zikenewe ku buryo iyi fu izajya yunganira ibindi biryo twaryaga”.

Umuyobozi w’umuryango Jesus Cares For Kids,  Mbabazi Teta Nadine avuga ko bamenye ibibazo by’ababyeyi bagana Ivuriro “Iranzi Clinic” bamenya ko hari abarigana benshi kandi batishoboye maze biyemeza kubagoboka hataraba ibibazo bikomeye byo kubyara abana bafite ibibazo by’imirire.

Mbabazi agira ati “Dusanzwe dukora ibikorwa byo gufasha ababyeyi batishoboye kwa muganga cyane cyane ku bitaro bya Kibagabaga ariko ho dufasha ababyeyi n’abana bamaze kugaragaraho ikibazo k’imirire mibi. Twaje hano kuri iri vuriro kugira ngo dufashe ababyeyi bahagana kubona ifu izajya ibunganira mu bibatunga bigira uruhare ku buzima bw’abana batwite kuko twamenye ko Itorero Christian Life Assembly ihafashiriza ababyeyi bataragira ibibazo byo kubyara abana batuzuye cyangwa ibindi bibazo mu buzima bwabo”.

Akomeza avuga ko yabashakiye ubufasha mu ruganda rwa AIF kugira ngo bage babaha ifu ya Nootri Mama, iya Nootri Toto na Nootri Family kugira ngo iyo fu yujuje ibisabwa mu gutunga umubyeyi ndetse n’umwana uri mu nda maze bizakumire ingaruka zose mbi zishobora kubabaho bitewe no kubura intungamubiri. Ati: “Bizatuma bataza Kibagabaga aho dufashiriza abandi kandi na nyuma ababyeyi bakomeze babone amashereka abana bakure neza ntibazarware bwaki”.

Ishimwe Marie Yvonne ukuriye abaforomo n’abaforomokazi mu ivuriro Iranzi Clinic yishimiye inkunga Umuryango Jesus Cares For Kids yabasabiye mu ruganda rukora amafu rwa AIF avuga ko bizafasha cyane ababyeyi bagana ivuriro kuko akenshi ryakira abantu batishoboye bo mu kiciro cya mbere n’icya kabiri cy’ubudehe.

Ishimwe avuga kandi ko hari ubufasha bari bafite bwahagaze kandi bwafashaga ababyeyi aho bitaga ku mubyeyi agitwita kugeza abyaye, ku buryo umubyeyi yishyuraga ibihumbi 5 gusa aho kwishyura ibihumbi 250.

Ikindi ni uko ababyeyi baba bagomba gufatwa ibizamini by’ubuzima bakaba basanga bitwara nk’ibihumbi 40 ariko kugeza ubu haracyari ubufasha ariko nabwo budahagije aho umubyeyi yishyura 10% by’amafaranga aba yaciwe.  Ishimwe ati” Hakenewe ubufasha kuko ababyeyi batishoboye kandi ibyo byose baba babikeneye kugira ngo hamenyekane uko ubuzima bw’umubyeyi bumeze ndetse n’ubw’umwana”.

Amos Muhunde ushinzwe ubucuruzi n’iyamamazabikorwa muri AIF yatangarije Imvaho Nshya ko AIF yishimiye gufatanya n’umuryango Jesus Cares For Kids mu gutera inkunga ababyeyi batishoboye nka gahunda nziza ubuyobozi bwawo bwiyemeje kuko ari kimwe mu bikorwa bigira impinduka nziza muri sosiyete nyarwanda.

Yavuze ko ibi bikorwa by’ubugiraneza byo gufasha basanzwe babikora mu bufatanye bwo gushyira hamwe hagati y’abakozi ku buryo buri mukozi nibura agira impano atanga y’udupaki 2 tw’ifu bakora.

Ikindi ni uko no hanze ibikorwa bikomeza bakareba abafatanyabikorwa bagashaka uburyo bwo gufasha benshi bashoboka kuko uruganda rubereyeho gufasha Abanyarwanda bakagira ubuzima bwiza, iyi ikaba ari nayo ntego nyamukuru yo kurwanya imirire mibi.

Umuyobozi ushinzwe ubuzima mu Karere ka Gasabo, Rutarindwa Alphonse yatangarije Imvaho Nshya ko ibikorwa by’Umuryango  Jesus Cares For Kids ari byiza kandi ko imiryango nk’iyo itera nkunga iba izwi mu Ihuriro ry’abafatanyabikorwa (JADF ).

Agira ati: “Ibikorwa byunganira Akarere biba bikenewe cyane nk’ibikorwa biharanira ubuzima bwiza bw’abaturage. Ntituba dushaka ko iyo miryango itera inkunga iha abantu ibyo kurya gusa ahubwo ko igomba no gufasha abantu kubafasha kubona ibibabeshaho hatabayeho guhora babibaha kuko hari uwavuga ngo agiye gutwita hari imiryango izamwitaho ntagire uruhare mu gushaka ikizamutunga n’umwana azatwita”.

Yagarutse ku buryo urwego rw’ubuzima rugenzura niba ibyo baha abaturage biba byujuje ubuziranenge, yemeza ko ibihabwa abatishoboye nabyo biba bikenewe kuko nabyo bifasha mu mibereho myiza y’abaturage cyane ko n’Akarere katari ku kigero kiza ku kibazo k’igwingira mu bana.

Akomeza avuga ko imiryango yose itera inkunga ifasha mu buzima ikenewe kandi ko n’imiryango ifunguye ko icyangombwa ari ukunyura mu Ihuriro ry’Abafatanyabikorwa b’Akarere ( JADF ) bakareba umurongo mwiza wo gufasha abantu kuko usanga haba hakenewe no kwigisha abaturage kurusha kubaha ibintu.

Ababyeyi bagana ivuriro Iranzi Clinic basanzwe bafashwa n’Itorero Christian Life Assembly ari naryo ryashyizeho ibikorwa bikorerwa muri iryo vuriro, aho babafasha gukumira ingaruka mbi zishobora kuba ku mwana n’umubyeyi bakurikirana ubuzima bw’umubyeyi utwite kugeza abyaye boroherezwa mu buvuzi mu gihe hari inkunga yo gufasha ibyo bikorwa.

Umwanditsi:

RUTAYISIRE EMILE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.