19°C , Clear | Kigali-Rwanda
Umukozi wa Galaxy Hotel, bafatiye mikoro, yereka abayeyi uko bategura indyo yuzuye bifashishije ibiribwa bahinga i wabo

Ababyeyi barahamagarirwa kwita ku mirire yabo n’iy’abana

Yanditswe na RUTAYISIRE EMILE

Ku ya 15-05-2018 saa 06:58:48

Ubuyobozi bw’Akarere ka Gasabo bwashishikarije ababyeyi gutegura indyo yuzuye ari ku bana ndetse n’abakuru cyane ko ibiribwa bihari ahubwo igikenewe ari ukumenya uko bitegurwa. Ako karere, USAID mu mushinga Twiyubake na Galaxy Hotel bahamagariye ababyeyi kwita ku buzima bwabo ndetse bakita ku buzima bw’umwana bamuha indyo yuzuye.

Umukozi wa Galaxy Hotel, bafatiye mikoro, yereka abayeyi uko bategura indyo yuzuye bifashishije ibiribwa bahinga i wabo

Ni mu muhango wabereye mu Murenge wa Nduba ejo hashize tariki ya 14/4/2018, ubwo hatangizwaga icyumweru cyahariwe kwita ku buzima bw’umubyeyi n’umwana. Umuyobozi wungirije ushinzwe imibereho myiza mu karere ka Gasabo, Nyirabahire Languida, yatangije icyo gikorwa hatangwa   ikinini k’inzoka cya Mebendazole ku bana bafite kuva ku mezi cumi n’abiri kugeza kuri mirongo itanu n’ikenda ndetse n’icya Vitamini A ku bana bafite kuva ku mezi 6 kugeza kuri 59.

Madamu Kankesha Clarisse, i buryo, wari uhagarariye Galaxy Hotel ahabwa ishimwe na Visi meya Madamu Nyirabahire Languida, kubera uruhare bagize mu kwita ku buzima bw’abana n’ababyeyi

Nyirabahire yasabye ababyeyi kurya indyo yuzuye kuva batwite kandi bakamenya ko n’umwana uvutse akomeza kubona ibimutunga bituma agira ubuzima bwiza. Yabwiye abagabo bari aho ko na bo bibareba, bagomba gufashanya mu kubonera umuryango indyo yuzuye. Yibukije ko ibisabwa kugira ngo indyo yuzuye iboneke byose babihinga ku buryo nta kibazo umwana n’umubyeyi bagombye kugira.

Visi meya ushinzwe imibereho myiza mu Karere ka Gasabo, Madamu Nyirabahire Languida, aha abana ikinini cya Vitamini A

Nyirabahire akaba yaravuze kandi ko serivisi zose zita ku buzima bw’umubyeyi n’umwana zikomeza gutangirwa mu Turere twose, ku ma site asanzwe akorerwaho gahunda z’ubuzima.

Umukozi ushinzwe gukurikirana ibikorwa by’ubuzima mu bitaro bya Kibagabaga, Uwimana Désiré, yashimiye ababyeyi bitabiriye uwo muhango, Minisiteri y’Ubuzima n’abafatanyabikorwa batera inkunga mu kurwanya imirire mibi mu bana barimo USAID mu mushinga wayo Twiyubake.

Umufatanyabikorwa wavuze mu izina rya Global Communities uhagarariye umushinga Twiyubake wa USAID muri AEE, Uwiringiye Siméon, yibukije ababyeyi kwita ku buzima bwabo ndetse n’ubw’abana kuva bagisama bafata inkingo kugeza umwana avutse bakita ku mirire yabo hagamijwe ko umwana agira ubuzima bwiza. Yabasabye gukomeza ibikorwa by’isuku birinda indwara zituruka ku mwanda  no guhugurana hagati yabo kugira ngo abana n’ababyeyi bakomeze kugira ubuzima bwiza, kuko ari byo bizatuma batera imbere.

Umukozi wari uhagarariye Galaxy Hotel, Madamu Kankesha Clarisse yavuze ko Hotel Galaxy igira uruhare mu gufasha Leta kurandura imirire mibi, ari yo mpamvu bateye inkunga yo kwigisha ababyeyi uko bategura indyo yuzuye. Kankesha yasabye abayobozi b’Inzego z’ibanze gukomeza kwegera abaturage bakabakurikirana kuko ikibazo bafite ari imyumvire.

Umukozi uteka muri Galaxy Hotel yeretse ababyeyi uko bategura indyo yuzuye yifashishije ibiribwa abaturage babona hafi yabo. Abana bari aho bafite ikibazo k’imirire bose baragaburirwa.

Nikuze Aline, yatanze ubuhamya bw’uko yarwaje bwaki kandi ntacyo akennye, yavuze ko ibyo guteka yabaga abifite ariko ntamenye uko babitegura ahamagarira bagenzi be bafite ikibazo k’imirire mibi kumva inama z’abajyanama b’ubuzima kuko ari zo zamufashije.

Ababyeyi bari bitabiriye uwo muhango wabereye i Nduba bahawe ifu ya Ongera ifasha umwana kugira ubuzima bwiza.

 

 

TANGA IGITEKEREZO

Leave a Reply

Be the First to Comment!

avatar