20°C , Partly cloudy | Kigali-Rwanda
Dr Gashumba Diane, Minisitiri w'Ubuzima (hagati), Dr Githinji Gitahi, Umuyobozi Mukuru w'Inama (ibumoso) n'abandi bayobozi baturutse muri Afurika no ku yindi migabane (Foto James)

90% bafite ubwishingizi bw’indwara, duhangayikishijwe n’abatabufite – Dr Gashumba

Yanditswe na Mugisha Benigne

Ku ya 05-03-2019 saa 17:14:16

Minisitiri w’Ubuzima, Dr. Gashumba Diane, atangaza ko Abanyarwanda basaga 90% bakoresha ubwishingizi bw’indwara, ariko igihugu kikaba gikomeza guhangayikishwa n’uwo mubare muto utabufite kinashaka ingamba zabyo.

Ibi Dr. Gashumba Diane yabitangarije mu nama nyafurika yiga ku buzima irimo kubera i Kigali mu Rwanda, ikaba yaranitabiriwe n’abakora mu by’ubuzima bo ku yindi migabane.

Yagize ati “Kugeza ubu Abanyarwanda 90% bafite ubwishingizi bw’indwara, bituma bagana amavuriro mu gihe barwaye, kandi bituma nta wurembera mu rugo ahubwo bagafata iya mbere mu kwivuza, gusa nanone Leta ihangayikishijwe n’uwo mubare muto utabufite.”

Minisitiri w’Ubuzima yagaragaje intambwe imaze guterwa mu buzima bw’imyororokere, aho abagore babyarira kwa muganga ari 91% naho abandi 9% bakabyarira mu rugo, ariko yemeza ko n’abo 9% bagomba gushakwa bakajya babyarira kwa muganga.

Gashumba kandi yavuze ko abana bakingiwe ari 93 %, uyu mubare n’ubwo ushimishije, ngo ariko n’abo 7% bagomba kumenyekana aho bari na bo bagakingirwa.

Yemeza ko ubushake bwa politiki ari bwo buhatse ibyo byose kuko Leta y’u Rwanda yifuriza Abanyarwanda bose ubuzima bwiza.

Dr. Gashumba yanavuze ko abana b’abakobwa bahawe urukingo rwa kanseri y’inkondo y’umura basaga 90%, bikaba bitanga ikizere cyo kugira abaturage n’ababyeyi b’ejo hazaza bafite ubuzima bwiza.

Avuga ko amavuriro yiyongereye yaba aya Leta n’ay’abikorera, bigafasha ko abantu bayabona hafi bigatuma bivuza batavunitse kongeraho ubwishingizi bw’indwara bufasha abantu kwivuza badahenzwe.

Yaboneyeho umwanya wo gusaba ababukoresha kujya bitwaza ayo basabwa, bityo ubwishingizi na bwo bukishyura ayo busabwa. Gashumba kandi yavuze ko Afurika yihaye intego y’uko gahunda y’ubuvuzi kuri bose kugeza mu mwaka wa 2030 izagerwaho kuko ibihugu by’Afurika birimo gushyira imbaraga mu kugeza abaturage ku buvuzi.

Yongeyeho ko ubuvuzi ari uburenganzira bw’ibanze bwa muntu, ari nayo mpamvu ibihugu by’Afurika bigomba gukora ibishoboka Abanyafurika bakabugeraho.

Dr. Githinji Gitahi, umuyobozi mukuru w’iyi nama, avuga ko Afurika yihaye intego yo kugeza ubuvuzi kuri bose, yemeza ko mu gihe ibihugu byose byafatanyiriza hamwe iyi ntego yagerwaho mu buryo bwihuse.

Yavuze ko abaturage bakwiye kubigiramo uruhare bakivuza kare mu gihe barwaye kandi bakagira umwete wo gushaka ubwishingizi bubagoboka mu gihe barwaye. Ati “Hari uruhare inzego z’ubuyobozi zigomba kugira mu kuvuza abaturage hari n’ibyo abaturage basabwa nabo baba bagomba kwitaho.” Asanga impande zombi zikwiye kugira icyo zikora kugira ngo ibintu bigende neza n’intego igerweho.

Dr Githinji Gitahi, Umuyobozi Mukuru w’abateguye inama (ibumoso) na Dr Gashumba Diane, Minisitiri w’Ubuzima (Foto James)

Nirere Beata wari uhagarariye abajyanama b’ubuzima muri iyi nama yagarutse ku buvuzi bw’ibanze butangwa n’abajyanama b’ubuzima, bikaba byaratumye nta muntu ukirembera mu nzu kuko urwaye ahabwa ubuvuzi akiri mu mudugudu, atakira akajyanwa kwa muganga.

Ati “Ubu nta muturage ukirembera mu nzu ngo ni uko kwa muganga ari kure, ahubwo umujyanama w’ubuzima arahagera agasuzuma umurwayi, yabona afite ibimenyetso bya malariya akamufata ikizamini yasanga ayirwaye akamuha imiti.”

Nirere avuga kandi ko abajyanama b’ubuzima bavura indwara z’impiswi ku bana, bagapima inda ku batwite, bagafasha ababyeyi kuboneza urubyaro n’ibindi.

Avuga ko ubufasha bw’abajyanama b’ubuzima kongeraho ubwisungane mu kwivuza byatumye Abanyarwanda benshi batongera kurembera mu rugo.

Dr Gashumba Diane, Minisitiri w’Ubuzima (hagati), Dr Githinji Gitahi, Umuyobozi Mukuru w’Inama (ibumoso) n’abandi bayobozi baturutse muri Afurika no ku yindi migabane (Foto James)

Inama yari yiganjemo abanyafrika bakora ibijyanye n’ubuvuzi ariko n’abandi bo ku yindi migabane baratumiwe (Foto James)

TANGA IGITEKEREZO

Leave a Reply

Your email address will not be published. Required fields are marked *