18°C , Partly sunny | Kigali-Rwanda
Abakinnyi ba APR VC bishimira gutsinda Gisagara VC mu mukino wo kwishyura wa Playoffs 2018

Volleyball:  APR VC na Gisagara VC zizakina undi mukino muri “Playoffs 2018”

Yanditswe na BUGINGO FIDELE

Ku ya 14-05-2018 saa 09:16:58

Ikipe ya APR VC yitwaye neza itsinda umukino wa kabiri wa “Playoffs” biyihesha amahirwe yo kuzakina umukino wa gatatu n’ikipe ya Gisagara VC kugira ngo hamenyekane ikipe izakomeza ku mukino wa nyuma.

Abakinnyi ba APR VC bishimira gutsinda Gisagara VC mu mukino wo kwishyura wa Playoffs 2018

Uyu mukino wabaye tariki 12 Gicurasi 2018, ikipe ya APR VC yari yakiriye Gisagara VC kuri Sitade Amahoro.  Nyuma yo gutsindwa umukino ubanza na Gisagara VC amaseti 3-0, APR VC yaje ishaka insinzi  biza no kuyihira kuko yatsinze amaseti 3-2 (23-25, 25-21, 21-25, 25-17 na 15-10).

Gutsinda uyu mukino byatumye aya amakipe anganya umukino 1-1, bivuze ko agomba gukina umukino wa 3 ari nawo uzerekana ikipe izakomeza ku mukino wa nyuma. Uyu mukino biteganyijwe ko uzabera i Gisagara tariki 19 Gicurasi 2018.

Umutoza wa Gisagara VC, Nyiramana Fidele yavuze ko icyatumye batsindwa ari uko biraye nyuma yo gutsinda umukino ubanza. Ati “Twateguye nabi nta bwo habaye kuvugana cyane no mu kibuga wabonaga ko abakinnyi  byari hasi”.  

Na ho umutoza wa APR VC, Sam Mulinge we yashimiye abakinnyi be  bakoze akazi katoroshye  batsinda  Gisagara VC ifite abakinnyi bafite ubunararibonye. Ati  “Byanyeretse ko  bamaze gutinyuka  binampa  n’ikizere kuri ejo hazaza habo kuko benshi baracyari bato”.

APR VC izakina umukino wa gatatu  wayihesha amahirwe yo gukina umukino wa nyuma iramutse itsinze

Aba batoza bombi bavuga ku mukino wa 3 uzerekana ikipe izahura na REG VC ku mukino wa nyuma, Nyirimana yagize ati “Iyo ushaka igikombe ni aha ugaragarira, nidutsinda bizaduha amahirwe yo kukegukana. Tugomba gutsinda rero”. Sam Mulinge “Umukino uzabera i Gisagara ariko uyu mukino dutsinze urerekana byose ko bishoboka”.

Gisagara VC izakinira umukino wa 3 wa Playoffs 2018 ku kibuga cyayo

REG VC yageze ku mukino wa nyuma

Ikipe ya REG VC nyuma yo gutsinda umukino wa kabiri yahise ibona itike yo gukina umukino wa nyuma. Iyi kipe yatsinze UTB VC amaseti 3-1 mu mukino wa mbere ndetse n’umukino  wa kabiri  iyi kipe yongera gutsinda UTB VC  amaseti 3-1 (25-22, 20-25, 18-25 na 20-25).

REG VC yatsinze UTB VC umukino wa kabiri ihita ikomeza ku mukino wa nyuma

Mu bagore amakipe azakina « Playoffs » na yo yaramenyekanye

Nyuma y’imikino y’umunsi wa nyuma ya shampiyona mu kiciro cy’abagore, ikipe ya RRA VC, APR VC, Ruhango VC na KVC ni zo zabonye itike yo gukina  imikino ya kamarampaka “Playoffs 2018”.

Iyi mikino yabaye tariki 12 Gicurasi 2018,  KVC  yatsinze GS St Joseph  amaseti 3-1 (25-17,25-19,19-25 na 25-20) naho  Ruhango VC itsinda KVC amaseti 3-1 (30-28,25-27,25-17 na 25-16).

Nyuma y’iyi mikino, RRA VC ni yo yasoje iyoboye n’amanota 33 ikurikiwe na APR VC (32), Ruhango VC  (21), KVC (16),GS St Aloys (15), IPRC Kigali VC (8)  na St Joseph (1)

TANGA IGITEKEREZO

Leave a Reply

Be the First to Comment!

avatar