26°C , Partly sunny | Kigali-Rwanda

COVID19: Rusizi na Rusumo habonatse abandi barwayi 11

Yanditswe na Imvaho Nshya

Ku ya 06-06-2020 saa 19:22:42

Kuri uyu wa Gatandatu tariki ya 6 Kamena 2020, habonetse abarwayi bashya 11 b’icyorezo cya Koronavirusi (COVID-19) mu bipimo 945 byafashwe mu masaha 24 ashize, hataha umuntu umwe wakize neza.

Ibyo byatumye umubare w’abamaze gukira ugera kuri 283 muri 431 bamaze gutahurwaho icyo cyorezo mu Rwanda. Abarwayi bashya bagaragaye mu Karere ka Rusizi na Rusumo mu Karere ka Kirehe, bakaba biyongeye ku bandi 10 batahuwe muri utwo turere ku munsi w’ejo.

Minisiteri y’Ubuzima yatangaje ko abatahuwe bose bashyizwe mu kato n’abo bahuye bagahita bakurikiranwa.

Kugeza ubu abakirimo kwitabwaho n’abaganga bageze ku 146  mu barwayi bamaze kuboneka  mu bipimo 75,013 byafashwe kuva umurwayi wa mbere yatahurwa muri Werurwe kugeza ubu, aho iki cyorezo kimaze gutwara ubuzima bw’abarwayi babiri.

Igikorwa cyo gupima abantu mu buryo bwa rusange mu Gihugu kirakomeje, ndetse Akarere ka Rusizi n’aka Rubavu twashyizwe mu kato mu gihe hagisuzumwa abantu ngo harebwe uko ubwandu buhagaze muri utwo duce.

Mu tundi turere, ingendo zihuza intara zitandukanye n’Umujyi wa Kigali zakomorewe. Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 177,953 barimo 78,834 bakize n’abandi 4,936 bahitanywe na cyo. Abamaze kwandura ku Isi bangana na 6,924,323 barimo abakize 3,389,204 n’abapfuye 400,257.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.