21°C , Partly sunny | Kigali-Rwanda
Muzola Aime Umuyobozi Mukuru wa WASAC 2

35% by’amazi ya WASAC apfa ubusa

Yanditswe na UWABEZA DJALIA

Ku ya 17-05-2018 saa 07:43:30

Ubuyobozi bw’Ikigo k’igihugu gishinzwe amazi, isuku n’isukura, WASAC, buvuga ko kugeza ubu amazi yacyo apfa ubusa angana na 35%.

Muzola Aime Umuyobozi Mukuru wa WASAC

Ibi Imvaho Nshya yabitangarijwe n’Umuyobozi Mukuru wa WASAC Aimé Muzola. Yavuze ko mu mazi yose ameneka adakoreshwa, n’amazi yose akoreshwa mu gutunganya ibikoresho bitanga amazi bya WASAC nk’ibigega by’amazi n’amatiyo, yose hamwe ageze ku kigereranyo cya 35%.

Muzola yagize ati “Kugeza ubu amazi apfa ubusa ageze kuri 35%, ariko hari ikirimo gukorwa kugira ngo ayo mazi adakomeza gupfa ubusa”. Yavuze ko mu mpamvu zituma ayo mazi apfa ubusa hakiri ibibazo by’amatiyo ashaje ndetse n’ayandi atoboka ugasanga amazi ameneka adakoreshwa ari menshi.

Gusa, mu gukemura iki kibazo, Umuyobozi mukuru wa WASAC, Muzola Aimé, avuga ko hari ikigiye gukorwa. Yagize ati “Hari umushinga ugiye gutangira wo guhindura amatiyo yose ashaje ndetse n’ayatobotse kugira ngo ikibazo cy’amazi apfa ubusa kirangire”.

Uyu muyobozi yavuze ko ikibazo cy’amatiyo y’amazi yangiritse ari ikibazo kigenda gikemurwa, cyane ko n’ibiza by’imvura na byo byangije amatiyo menshi yagombaga guhita akorwa, n’andi akirimo gukorwa ndetse n’ayandi azakomeza gukorwa mu gihe kiri imbere.

Abatuye ibice bya Karambo na Kanombe barahumurizwa

Imvaho Nshya yabajije Muzola ku kibazo cy’abatuye mu duce tumwe na tumwe twa Kigali bakunda kubura amazi igihe kirekire ugereranyije n’abandi. Utwo duce ni nka Karambo mu murenge wa Gatenga no mu bice bya Kanombe hose ho mu Karere ka Kicukiro.

Aha, umuyobozi mukuru wa WASAC yamaze impungenge abaturage batuye muri utwo duce dukunda kubura amazi, avuga ko ikibazo cyabo kizwi kandi kiri muri gahunda zo gukemurwa vuba.

Yakomeje agaragaza zimwe mu mpamvu zituma ibyo bice bikunze kubura amazi, ko n’amatiyo ari ikibazo, avuga ko ikindi kibazo ari uko abaturage ari benshi cyane kurusha amazi yateganyijwe, bityo ko mu gihe amazi ataraba menshi ngo abahaze bose bakwiye kuyasaranganya. Iyi ngo ni yo mpamvu usanga babona amazi gake.

Umuyobozi Mukuru w’ikigo k’igihugu gishinzwe amazi, isuku, n’isukura Muzola Aimé, yasabye abaturage ko bagomba kuzamukana n’iterambere mu gihe amazi abagezeho bakamenya kuyabika ahantu habugenewe kugira ngo ikibazo cy’amazi kidakomeza kubabera ingutu mu gihe WASAC ikirimo kureba icyakorwa ngo ikibazo cy’amazi y’imbonekarimwe gikemuke burundu mu bice bigifite, aho abura igihe kirekire.

Abaturage batuye mu duce dukunda kubura amazi bakaba basaba ikigo WASAC ko bajya babafasha bakamenyeshwa igihe bazajya bohererezwa amazi kugira ngo bashobore kuba biteguye kuyavoma, nk’uko Mugenzi Anastase wo mu Karambo yabyifuje, kuko ngo aza benshi ntibahite babimenya.

 

TANGA IGITEKEREZO

Leave a Reply

Be the First to Comment!

avatar