2024: Ubukungu bw’igihugu buzaba buciriritse – Dr Mukeshimana

Yanditswe na Kayitare Jean Paul

Ku ya 25-11-2019 saa 07:43:52
Minisitiri w'Ubuhinzi n'Ubworozi Dr. Mukeshimana Geraldine yasuye Itorero Ingamburuzabukene

Minisiteri y’Ubuhinzi n’Ubworozi (MINAGRI) yizera muri gahunda ya Guverinoma y’imyaka 7 (NST1) yifuza ko ubukungu bw’igihugu buzaba buciriritse.

Minisitiri w’Ubuhinzi n’Ubworozi, Dr Mukeshimana Geraldine, yagaragaje ko abakora mu buhinzi n’ubworozi bifuza igihugu cyaba giteye imbere nk’uko ibipimo bitandukanye bibivuga.

Minisitiri Dr Mukeshimana yabigarutseho ku mugoroba wo ku Cyumweru tariki ya 24 Ugushyingo 2019, mu kiganiro yagejeje ku ntore 497 zituruka muri MINAGRI, NAEB na RAB zirimo gutorezwa mu kigo gitorezwamo umuco w’ubutore cya Nkumba, giherereye mu murenge wa Kinoni mu karere ka Burera mu Ntara y’Amajyaruguru.

Minisitiri Dr. Mukeshimana yagize ati “Twifuza ko mu 2024 igihugu cyacu kizaba gifite ubukungu buciriritse, hanyuma ariko mu 2035 tukazaba turi hafi gushyikira ibihugu biteye imbere. Aho turi uyu munsi n’aho twifuza kujya, birasaba kuvanaho imitego yose abantu bahura nayo.”

Minisitiri Dr. Mukeshimana yemeza ko muri gahunda ya NST1, urwego rw’ubuhinzi n’ubworozi hari intambwe ruzaba rumaze gutera. Ati “Ikerekezo ni ik’igihugu si icya Minisiteri y’Ubuhinzi n’Ubworozi, kandi aho twifuza kujya buri wese abifitemo uruhare.”

Avuga kandi ko ubukungu bw’igihugu bwazamutseho 5%. Ubuhinzi ngo bwiharira 30% by’umusaruro mbumbe wose w’igihugu ariko ngo hakaba higanjemo umusaruro ngandurabukungu; ibyoherezwa mu mahanga; ikawa, icyayi, imboga, inka n’ibindi.  Avuga ko hari n’amashyamba, amafi, n’ibindi. Kwemeza ko mu bukungu bw’igihugu ubuhinzi buza ku isonga, aho bwiharira 30% mu gihe hakurikiraho inganda, ubucukuzi bw’amabuye y’agaciro, amashanyarazi n’ amazi.

Nyamara ariko Minisitiri w’Ubuhinzi n’Ubworozi Dr Mukeshimana, agaragaza ko hari byinshi byakorwa kugira ngo ubuzima bw’Abanyarwanda butere imbere. Ati “Dufite byinshi twakora kugira ngo abaturage bashobore gutera imbere. Ubuzima bw’Abanyarwanda buratureba akaba ariyo mpamvu tugomba guhindura uburyo twakoragamo kandi tugaharanira kwigirira ikizere.”

Umukozi w’Akarere ka Gatsibo mu murenge wa Ngarama ushinzwe ubuhinzi, Manirakiza Josiane, yashimye imikorere n’imikoranire biranga abakozi b’uturere n’imirenge n’ubuyobozi bw’Ikigo k’Igihigu cy’Ubuhinzi RAB kuko ngo kibegera kenshi.

Abakozi bose bakora mu buhinzi n’ubworozi bitabiriye itorero Ingamburuzabukene

Umwanditsi:

Kayitare Jean Paul

One Comment on “2024: Ubukungu bw’igihugu buzaba buciriritse – Dr Mukeshimana”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.