21°C , Partly cloudy | Kigali-Rwanda
Mu mwaka wa 2024, amabuye y'agaciro azaba yinjiriza u Rwanda amadolari y'Amerika miliyari n'igice, ari nako benshi babona akazi mu bucukuzi bwayo (Foto Mukagahizi R.)

2024: Amabuye azaba yinjiriza u Rwanda amadolari miliyari 1.5

Yanditswe na Mutungirehe Samuel

Ku ya 28-10-2018 saa 17:27:39

Ikigo k’Igihugu Gishinzwe Ubucukuzi bw’Amabuye y’Agaciro, Gaze na Peteroli, gitangaza ko mu mwaka wa 2024 giteganya kuzaba gikura miliyari imwe n’igice y’Amadolari y’Amerika mu musaruro uva mu bucukuzi bw’amabuye y’agaciro.

Ni mu gihe mu mwaka wa 2017 habonetse miliyoni 373 z’amadolari y’Amerika.

Imibare ya raporo y’iki kigo igaragaza ko kuva mu 2010 kugeza mu 2014 umusaruro w’amabuye y’agaciro wavuye kuri miliyoni 71 z’amadolari y’Amerika agera kuri miliyoni 226 mu mpera za 2013.

Umusaruro wagabanutse ho gato mu myaka yakurikiye ugera kuri miliyoni 142 mu 2015 ariko hashyirwaho ingamba zitandukanye mu kohereza umusaruro wongerewe agaciro bituma winjiriza u Rwanda amadolari miliyoni 373 mu mwaka ushize wa 2017.

Mu mibare y’agateganyo y’Ikigo Gishinzwe Ubucukuzi bw’Amabuye y’Agaciro, Gaze na Peteroli, igaragaza ko mu 2020 ubucukuzi bw’amabuye y’agaciro buzaba bwinjiriza u Rwanda miliyoni 800 z’amadolari y’Amerika, naho mu 2024 azagera kuri miliyari imwe n’igice y’amadolari.

Ibi bizaturuka kandi ku kwiyongera k’umusaruro w’amabuye y’agaciro aho mu 2020 u Rwanda ruzaba rucukura toni 10.000 ku mwaka, mu gihe mu mwaka wa 2024 zizaba ari toni 14.000 ku mwaka.4

Mu mwaka wa 2024, amabuye y’agaciro azaba yinjiriza u Rwanda amadolari y’Amerika miliyari n’igice, ari nako benshi babona akazi mu bucukuzi bwayo (Foto Mukagahizi R.)

Ubucukuzi bw’amabuye y’agaciro buzaba kandi butanga imirimo 40.000 mu mwaka wa 2020 mu gihe mu 2024 buzaba butanga imirimo ibihumbi 200 y’ubucukuzi bwa kinyamwuga.

Mu mwaka wa 2020 umurimo wo gucukura amabuye y’agaciro uzaba wita ku bidukikije ku kigero cya 25% mu gihe mu mwaka wa 2024 bizaba bikorwa ku kigero cya 50%.

Umuyobozi Mukuru w’Ikigo k’Igihugu Gishinzwe Ubucukuzi bw’Amabuye y’Agaciro, Gaze na Peteroli, Gatare Francis, avuga ko mu mabuye y’agaciro yoherezwa ku isoko mu mahanga, amabuye ya koruta ari amwe mu bishyira amafaranga menshi mu isanduku ya Leta kandi aninjiriza abari mu bucukuzi bwayo.

Hagati y’ukwezi kwa karindwi (Nyakanga) 2017 n’ukwezi kwa gatandatu (Kamena) 2018, mu Rwanda hacukuwe toni zirenga 2000 z’amabuye ya Koruta, hitezwe gucukurwa toni zirenga 2500 kugeza mu mwaka wa 2018.

Ubucukuzi bw’amabuye y’agaciro buteza imbere ababukoramo, ariko kandi bukaninjiriza igihugu amadevize. Leta yiyemeje kongera amafaranga amabuye yinjiriza igihugu (Foto Mukagahizi R.)

TANGA IGITEKEREZO

Leave a Reply

Your email address will not be published. Required fields are marked *