21°C , Partly cloudy | Kigali-Rwanda

2020/2021: Imisoro yinjizwa mu Rwanda izagabanyukaho miriyari 147.6

Yanditswe na Imvaho Nshya

Ku ya 21-05-2020 saa 12:07:28

Minisiteri y’Imari n’Igenamigambi yatangaje ko imisoro u Rwanda ruteganya kwinjiza izagabanyukaho miriyari 147.6 z’amafaranga u Rwanda, ikava kuri miriyari 1,569.0 yateganywaga mu mwaka wa 2019-20 ikagera kuri miriyari 1,421.4 mu 2020/21.

Minisitiri w’Imari n’Igenamigambi Dr Ndagijimana Uzziel, yatangaje igabanyuka ry’imisoro ubwo yagaragarizaga abagize Iteko Ishinga Amategeko imitwe yombi, imbanzirizamushinga y’ingengo y’imari y’umwaka wa 2020/2021 kuri uyu wa Kane tariki 21 Gicurasi 2020.

Minisitiri Dr. Ndagijimana yashimangiye ko nubwo imisoro izagabanyuka, ingengo y’imari y’umwaka utaha iziyongeraho 7.5 % ni ukuvuga amafaranga y’u Rwanda miriyari 228.6.

Biteganyijwe ko ingengo y’imari u Rwanda y’umwaka wa 2020/2021 izagera kuri miliyari 3245.7 z’amafaranga y’u Rwanda, ivuye kuri miriyari 3017.1 zakoreshejwe mu mwaka w’ingengo y’imari ushize.

Minisitiri Dr Ndagijimana yavuze ko COVID-19 yahungabanyije ibikorwa by’ubucuruzi byavagamo imisoro, bityo ingengo y’imari ikaba izongerwa ivuye mu zindi nzego zigize ubukungu bw’Igihugu.

Bityo Guverinoma izongera inguzanyo ziva hanze no mu Gihugu hibandwa ku zihendutse zijyanye n’igipimo ntarengwa cy’umwenda w’Igihugu.

Biteganyijwe ko amafaranga akomoka imbere mu Gihugu habariwemo n’inguzanyo z’imbere mu Gihugu azaba ari miliyari 1962.8 agize na 60.5 % by’ingengo y’imari yose

Inkunga z’amahanga zizaba zingana na 15.2 % by’ingengo y’imari yose, mu gihe inguzanyo z’amahanga zizaba zigize 24.1 %.

Muri rusange amafaranga ava imbere mu gihugu wongeyeho inguzanyo z’amahanga agize  84.6 % byIngengo y’Imari.

Ibikorwa bizibandwaho cyane ni ukongerera imbaraga urwego rw’ubuzima, kongera umusaruro w’ubuhinzi n’ubworozi, kongera gahunda zigamije guteganyiriza abaturage no kurinda amagara yabo, guhanga amahirwe menshi y’imirimo, gushigikira ibigo bito n’ibiciririze ndetse n’ibinini byagizweho ingaruka na COVID-19.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.