17°C , Partly cloudy | Kigali-Rwanda
Ubuyobozi bukuru bwa NISR bwari bwitabiriye ikiganiro n'abanyamakuru hagaragazwa uko DGP y'igihugu ihagaze mu mwaka ushize wa(Foto James)

2018: Umusaruro mbumbe w’u Rwanda wiyongereye ku kigero cya 8.6%

Yanditswe na Sezibera Anselme

Ku ya 15-03-2019 saa 14:32:19

Mu mwaka wa 2018, umusaruro mbumbe w’igihugu wari ufite agaciro ka miliyari 8.189Rwf, ukaba wariyongereye ku kigero cya 8,6%.

Ni amakuru dukesha Minisiteri y’Imari n’Igenamigambi (MINICOFIN), aho ivuga ko iryo zamuka rifitwemo uruhare ahanini n’umusaruro w’inganda wazamutse ku kigero kingana na 10%.

Byagatangarijwe abanyamakuru kuri uyu wa 15 werurwe 2019, mu gikorwa iyo Minisiteri ikora buri gihembwe nyuma yo kwakira imibare itangwa n’Ikigo cy’Igihugu gishinzwe ibarurishamibare (NISR) ku bijyanye n’uko ubukungu buba bwifashe mu gihembwe cyabanje.

Minisitiri w’Imari n’igenamigambi, Dr Ndagijimana Uziel, ari kumwe n’abayobozi ba NISR, avuga umusaruro w’ubuhinzi wazamutse ku rugero rwa 6%, umusaruro wa serivisi uzamuka ku kigero kingana na 9% mu gihe umusaruro w’inganda ari na wo waje ku isonga wazamutse ku rugero rwa 10%.

Agira ati: “Izamuka rya 8.6% rishingiye ku musaruro wagiye uboneka uko ibihembwe bikurikirana, aho wazamutse ku rugero rwa 10.4% mu gihembwe cya mbere, 6.8% mu gihembwe cya kabiri, 7.7% mu gihembwe cya gatatu, mu gihembwe cya kane ari na cyo tugarukaho umusaruro mbumbe ukazamukaho 9.6%”.

Nk’uko akomeza abisobanura mu byiciro by’ubukungu, umusaruro mbumbe w’igihembwe cya 4 by’umwihariko wazamutse muri ubu buryo bukurikira. Dr Ndagijimana atangariza abanyamakuru ko umusaruro w’ubuhinzi wazamutse kuri 4%, inganda 12% hanyuma serivisi kuri 11%.

Minisitiri w’Imari n’Igenamigambi Dr Ndagijimana Uziel iburyo hamwe n’Umuyobozi Mukuru wa NISR Murangwa Yussuf (Foto James)

Mu rwego rw’ubuhinzi izamuka rya 4% ngo ryatewe ahanini no kwiyongera k’umusaruro w’ibiribwa ngandurarugo mu bihembwe by’ihinga B na C wiyongereye ku rugero rwa 3%, ubworozi buzamuka ku rugero rwa 14%. Gusa n’ubwo ahamya ko umusaruro wiyongereye, atangaza ko uwerekeranye n’ibihingwa byagiye byoherezwa mu mahanga wo wagabanutseho 4%.

Dr Ndagijimana avuga ko mu rwego rw’Inganda, izamuka ringana na 12% ryatewe ahaninin’ibikorwa by’ubwubatsi byiyongereye ku kigero cya 20%, naho mu zindi nganda zitunganya ibintu bitandukanye umusaruro ukaba warazamutseho ku kigero cya 13%, bitewe ahanini n’izamuka rya 10% ry’musaruro w’inganda zitunganya ibiryo, 26% ry’umusaruro w’inganda zitunganya imyenda, na 38% ry’umusaruro w’inganda zikora ibikoresho bikoze mu cyuma.

Mu Rwego rwa Serivisi naho Dr Ndagijimana atangaza ko izamuka rya 11% ryatewe ahanini n’umusaruro wa za serivisi z’ubucuruzi wazamutseho 14%, uwa serivisi z’ubwikorezi uzamukaho 16% bitewe ahanini n’imirimo y’ubwikorezi bwo mu kirere wiyongereyeho ku rugero rwa 36%.

Akomeza agira ati: “Muri iyo serivisi yavugwaga kandi umusaruro wanazamutseho bitewe na serivisi z’ibigo by’itumanaho n’ikoranabuhanga wazamutse ku kigero kingana na 14%, uwa serivisi zimari ukazamukaho 12% naho uwa serivisi zo gucumbikira, kwakira no kugaburira abantu ukazamukaho 11%”.

Uretse ariko kuba hagaragajwe ibyiciro byagize uruhare mu izamuka ry’uwo musaruro mbumbe, ibindi bitagaragajwe birimo guteza imbere ibikorerwa mu Rwanda (Made in Rwanda), ubucukuzi bw’amabuye y’agaciro, korohereza inganda mu mikorere naho zishyirwa no kubona igishoro biri mu byagize uruhare muri iryo zamuka.

Ubuyobozi bukuru bwa NISR bwari bwitabiriye ikiganiro n’abanyamakuru hagaragazwa uko DGP y’igihugu ihagaze mu mwaka ushize wa(Foto James)

TANGA IGITEKEREZO

Leave a Reply

Your email address will not be published. Required fields are marked *