18°C , Partly cloudy | Kigali-Rwanda
Chairman w'Ishyirahamwe ry'Ibigo by'ubwishingizi ASSAR, Kanamugire Gaudens (Foto Samuel M)

2018: Ibiciro bishya by’ubwishingizi bw’ibinyabiziga byasubiwemo

Yanditswe na MUTUNGIREHE SAMUEL

Ku ya 22-01-2018 saa 06:06:18

Ishyirahamwe ry’ibigo by’ubwishingizi mu Rwanda, ASSAR, ryatangaje ko ibiciro bishya by’ubwishingizi bw’ibinyabiziga byari byatangiye kubahirizwa mu ntangiriro z’uyu mwaka wa 2018 bihindutse, nyuma y’uko abafite ibinyabiziga bagaragaje kutabyishimira, bishyirwa mu byiciro bibiri, biva ku kigero cya 100% bigera kuri 60% mu 2018.

Chairman w’Ishyirahamwe ry’Ibigo by’ubwishingizi ASSAR, Kanamugire Gaudens (Foto Samuel M)

Ejo hashize tariki ya 21 Mutarama 2018, mu kiganiro n’Itangazamakuru, Umuyobozi w’Inama y’Ubutegetsi (Chairman) ya ASSAR, Kanamugire Gaudens yavuze ko kuva hatangazwa impinduka mu biciro by’ubwishingizi bw’ibinyabiziga, iri shyirahamwe ryumvise ibyifuzo by’abakiliya.

Ati “Twasabye ko ibiciro byatanzwe n’inyigo twabishyira mu byiciro bibiri, tugatangira twongera ibiciro ku kigero cya 60% uyu mwaka 2018, aho kugira ngo inyongera ibe icyarimwe, umwaka utaha 2019 bikaziyongeraho 40% tukagera aho inyigo yatangaga igisubizo ku byaba ari umuti wo gukemura ibibazo byari bihari”.

Yasobanuye ko banzura kuzamura ibyo biciro by’ubwishingizi, hari ikibazo kuko bari bamaze igihe kinini bagendera ku biciro byo mu 2008, ku buryo abishingizi bari basigaye bafite ibibazo byo kudashobora gusohoza inshingano zabo zo kwishyura impanuka bituma bahora bagendera mu bihombo bigera aho bitagishoboka ko bakomeza gukorera muri iyo mikorere.

Urugero rw’ibiciro bishya bigiye gukoreshwa muri uyu mwaka wa 2018, ni uko nk’ubwishingizi bwa moto igiciro kigiye kuba ibihumbi 42 mu gihe byari kuba ibihumbi 50 ku biciro bishya bivuye ku bihumbi 30 byari bisanzwe.

Ku biciro by’imodoka zikora taxi bigiye kuba ibihumbi 312 ku mwaka mu gihe inyingo nshya yagenaga igiciro gishya k’ibihumbi 378 ku mwaka.

Chairman wa ASSAR, yongeyeho ko ibyo biciro bivuguruye bizatuma serivisi zirushaho kuba nziza kuko bizatanga ubushobozi ku bigo by’ubwishingizi ku nshingano zabyo kugeza mu mwaka wa 2019 ubwo bizaba byubahirijwe uko inyigo y’ibiciro bishya yabiteganyije.

Minisitiri w’Imari n’Igenamigambi, Amb Gatete Claver yavuze ko na Leta ubwayo iyo yumvise ko abaturage bafite ikibazo nayo itabyihorera, bityo yasabye n’abishingizi kugira ngo bagire uko basubiza abakiliya ku busabe bwabo.

Ku ruhande rw’abarebwa n’ubwishingi, Ndagijiman Casimir utwara abagenzi kuri moto yagize ati “Nishyuraga ibihumbi 46, ku biciro bishya nasabwaga kwishyura mu bihumbi birenga 72. Ibyo biciro bindi bigiye kudufasha cyane kuko amafaranga yari menshi. Wajyaga gushaka uguha moto akakubwira ngo ubwishingizi buri hejuru.”

Mugenzi we Murwanashyaka Venuste ati “Nkange ubwange, umusoro ku nyungu, ubwishingizi n’ipatante bikunze gushirira rimwe, ayo mafaranga byari kuzangora kuyabona; babigabanyije baba badufashije cyane.”

 

 

TANGA IGITEKEREZO

Leave a Reply

Be the First to Comment!

avatar