21°C , Partly sunny | Kigali-Rwanda
Gatari Egide ushinzwe gahunda ya Nkunganire mu Kigo k'Igihugu cy'Ubuhinzi n'Ubworozi, RAB (Foto Rose M)

2018-2019: U Rwanda ruzakoresha hafi miliyari 10 muri gahunda ya Nkunganire

Yanditswe na UWAYISABA FRANCINE

Ku ya 12-10-2018 saa 11:37:54

Ikigo k’Igihugu gishinzwe Ubuhinzi n’Ubworozi, RAB, gitangaza ko muri uyu mwaka w’ingengo y’imari wa 2018-2019 u Rwanda rwateganyije amafaranga miliyari 9 na miliyoni 600 azashyirwa muri gahunda ya Nkunganire.

Nkunganire ni gahunda ifasha abahinzi kugezwaho ifumbire n’imbuto y’indobanure ku buryo bworoshye kandi buhendutse. Ikaba kandi yarashyizweho ngo ifashe abahinzi kongera umubare w’ibihingwa ndetse n’amafumbire akoreshwa mu buhinzi.

Umuyobozi ushinzwe gahunda ya Nkunganire mu Kigo k’Igihugu cy’Ubuhinzi n’Ubworozi, RAB, Gatari Egide, avuga ko muri uyu mwaka wa 2018-2019, Leta izashyira amafaranga angana na miliyari 9 na miliyoni 600 muri iyi gahunda.

Ati: “Aya mafaranga azakoreshwa mu gihugu hose tugeza ifumbire mvaruganda ku bahinzi b’ibihingwa bitandukanye. Ifumbire izakoreshwa ifitemo agaciro ka miliyari 5 na miliyoni 600, noneho asigaye yose, miliyari 4 akoreshwe ku mbuto.”

Gatari avuga ko aya mafaranga azakoreshwa hatangwa ifumbire yo ku bihingwa 10 hagatangwa n’imbuto ya soya, ibigori n’ingano, kandi hagakurikizwa uturere mu gutanga imbuto bitewe n’aho icyo gihingwa batanze keramo ndetse n’ikirere cyaho uko kifashe. Ati: “Nk’ubu soya ntiwayihinga mu Majyaruguru n’ingano ntiwazihinga Iburasirazuba.”

Bamwe mu bahinzi bakoresha gahunda ya Nkunganire, bavuga ko imaze kubageza kuri byinshi kandi byiza, bityo bashimira Leta y’u Rwanda ikomeza gutekereza ku buhinzi ikanaharanira kubateza imbere.

Nyiramariza Beatrice, umuturage wo mu karere Kamonyi uhinga imboga, avuga ko iyi gahunda yatumye umusaruro we wiyongera ku rwego rushimishiije. Ati: “Na mbere twarahingaga tukeza ariko isoko tukarisagurira duke, ariko iyi gahunda imaze kuza, twarejeje umusaruro uba mwinshi pe! Imboga zareze kuko twabonye ifumbire ku gihe ndetse tunahinga imbuto nziza. Ikindi kandi ni uko kubera iyi gahunda twamenye ko iyo ubutaka busharira dukoresha ishwagara bugakira. Ubu maze kugera kuri byinshi rero kubera imboga.”

Nyiramariza avuga ko mbere yacuruzaga butike ariko akabona nta nyungu ihagije afite agashora mu buhinzi, ahamya ko iyo guhinga ubishyizemo imbaraga byungura cyane kurenza ikindi cyose wakora.

Ati “Mu buhinzi habamo inyungu cyane kuko iyo ushyize ku isoko ubasha nawe kubona ibyo udafite kandi ukabibona bivuye mu mbaraga zawe”.

TANGA IGITEKEREZO

Leave a Reply

Your email address will not be published. Required fields are marked *