17°C , Partly cloudy | Kigali-Rwanda
Gukora, kwagura no gusana imihanda biri muri gahunda ya Guverinoma y'u Rwanda, hagamijwe koroshya imigenderanire no guhahirana

2017-2024: MININFRA yagaragaje imiterere y’imihanda izubakwa n’izasanwa

Yanditswe na Kayitare Jean Paul

Ku ya 15-05-2019 saa 18:36:59

Gahunda ya Guverinoma y’imyaka irindwi (2017-2024) izwi nka NST1, iteganya kubaka imihanda mishya no gusana isanzwe mu Mujyi wa Kigali no mu ntara zitandukanye.

Mu gikaniro kihariye Imvaho Nshya yagiranye na Byiringiro Alfred, umuyobozi w’ishami rishinzwe gutwara abantu n’ibintu muri Minisiteri y’Ibikorwa remezo (MININFRA), avuga ko muri gahunda ya Guverinoma y’imyaka 7, ibirometero 800 by’imihanda minini bizubakwa.

Iyo mihanda minini harimo umuhanda Ngoma-Nyanza ufite ibirometero birengaho 120, Kagitumba-Kayonza-Rusumo ureshya n’ibirometero 208, umuhanda Base-Rukomo-Nyagatare ufite ibirometero 127, umuhanda Base-Butaro ufite ibirometero 63.

Ku mihanda minini aho inyura mu migi hari ibirometero bizagenda byubakwaho ariko ntibiranozwa neza kuko bigomba gukorerwa inyigo. Ati “Tuvuge niba tuzubaka umuhanda Ngoma-Bugesera-Nyanza urimo ibice bibiri birimo Ngoma-Ramiro na Kibugabuga-Gasoro, iyo mihanda imigi inyuramo tuzagenda twubakaho ibirometero bike mu mugi.”

Umuhanda Ngoma hari ibirometero biteganyijwe kuzubakwa binyuze kuri uwo mushinga, byagera Bugesera hari ibizubakwa biciye kuri uwo muhanda, umuhanda Base-Rukomo naho ni ko bizagenda, byagera Rukomo hari ibirometero birimo kubakwa aho naho ngo nta mpungenge iyi minisiteri ifite ko bitazarangira.

Byiringiro Alfred yakomeje avuga ko mu mihanda yo mu Mujyi wa Kigali bateganyije ko hazubakwa ibirometero 200 mu gihe mu migi yunganira uwa Kigali hazubakwa ibirometero 150.

Ati “Nk’uko bisabwa, twatangiye gukorana n’Uturere ndetse n’imigi yunganira ndetse n’Umujyi wa Kigali kugira ngo inyigo zikorwe birangire. Nta mpungenge dufite ko iyo mihanda izubakwa. Imihanda yo mu migi yunganira Kigali turimo gukorana na Banki y’Isi kugira ngo hubakwe iyo mihanda kuko ibiganiro byarakozwe kugira ngo humvikanwe ibirometero bizagenda byubakwa muri buri karere.”

Avuga ku mihanda izubakwa ku birometero 250 ahantu hajyanye no kunoza imiturire, Byiringiro yavuze ko hazakoreshwa kaburimbo idahenze kandi itameze nk’isanzwe. Avuga ko iyi mihanda iba ihenze cyane kandi ugasanga ijya kumara igihe kimwe n’imihanda ihendutse, akavuga ko iyo ari yo izajya ikoreshwa.

Aha, avuga ku biciro byayo, yagize ati “Twasanze izajya ifata miriyoni hafi 211 ni yo menshi ku kirometero, mu gihe iyi kaburimbo twakoreshaga miriyoni 600 ku kirometero bitewe nuko abaje ku isoko babaye benshi.”

Aho imwe imihanda igeze ikorwa

Minisiteri y’Ibikorwa remezo ivuga ko umuhanda Kagitumba-Kayonza-Rusumo, imihanda myinshi irimo ibice bitatu byose bigeze hejuru ya 75%. Harimo ahari kuri 85% nk’umuhanda Gabiro-Kayonza, umuhanda Kayonza-Rusumo ugeze kuri 75% hanyuma Gabiro-Kagitumba naho uri hejuru ya 75%.

Byiringiro akomeza agira ari “Iyo tugiye ku mihanda Base-Rukomo turi hejuru ya 85% uretse ko hagiye hazamo guca mu gishanga no guhindura kugira ngo umuhanda ukomere. Umuhanda Rukomo-Nyagatare ugeze hafi kuri 20%, Ngoma-Nyanza ubu twamaze kubona rwiyemezamirimo uzakora Kibugabuga-Gasoro. Kibugabuga-Gasoro ubwo ni Bugesera-Nyanza ho amafaranga yarabonetse igisigaye ni ugusinya amasezerano.

Ngoma-Ramiro uzakora inyigo yamaze kuboneka. Huye-Kibeho imirimo yaratangijwe. Umuhanda Base-Butaro ntiwagenze neza nkuko byifuzwaga kuko mbere wakorwaga ari Leta iwutera inkunga ariko haza kuboneka abafatanyabikorwa. Aho bigeze hagiye gutangwa isoko.”

Ingano y’imihanda izubakwa, MININFRA ivuga ko umuhanda Ngoma-Bugesera-Nyanza ufite ibirometero 123, umuhanda Huye-Kibeho-Munini ufite ibirometero 166, umuhanda Base-Butaro ufite ibirometero 68, umuhanda Base-Gicumbi-Rukomo ufite ibirometero 124.

Minisiteri y’Ibikorwa remezo igaragaza ko mu mujyi wa Kigali imihanda igeze kure yubakwa, igatanga urugero rw’umuhanda Sonatube-Gahanga watangiye kubakwa, Umuhanda Nyabugogo-Giticyinyoni nawo biteganyijwe ko ngo uzubakwa kugira ngo umubyigano w’imodoka ugabanuke.

Umuyobozi w’ishami rishinzwe gutwara abantu n’ibintu muri MININFRA, Byiringiro, avuga ko bateganya kubaka umuhanda uzenguruka Umujyi wa Kigali akaba ari nawo usa n’ukiri inyuma kuko ngo nta yandi mahitamo kubera ko imodoka zirimo kugenda ziyongera. Iyo ni imihanda izubakwa ivuye ku bitaka ijya kuri kaburimbo.

Indi mihanda izasanwa

Byiringiro avuga ko imihanda izasanwa ari yo ikubiye mu birometero 800, Kagitumba-Kayonza-Rusumo wavuzwe hejuru ufite ibirometero 208, umuhanda Musanze-Cyanika ufite ibirometero 32 na wo ngo ugomba gusanwa.

Indi mihanda izasanwa kandi muri iyi gahunda ya Guverinoma, ni nka Muhanga-Karongi, umuhanda wundi ni Karongi-Rubengera wo ngo wamaze gusanwa, Rubengera-Rambura amafaranga yarabonetse kandi ngo ubu harimo gutangwa amasoko.

Kugeza ubu Minisiteri y’Ibikorwa remezo igaragaza ko hazaba hasigaye umuhanda Rubengera-Muhanga na wo ukaba urimo gushakirwa abafatanyabikorwa. Huye-Kitabi uri hafi kuri 90%, umuhanda Kigali-Muhanga-Kanyaru hari ibirometero 157 bizagera mu 2024 na wo waramaze gusanwa.

Ikindi gikubiye muri gahunda ya Guverinoma y’imyaka irindwi, ni ugucanira iyi mihanda yose minini, ihuza u Rwanda n’ibindi bihugu ndetse n’indi. Iki kikaba ari igikorwa cyanatangiye, Ikigo k’Igihugu k’Ingufu, REG, gitangaza ko bizagera mu 2024 iki gikorwa cyararangiye.

Iyi mihanda yose ikaba ikorwa mu rwego rwo kurushaho guteza imbere ubucuruzi n’ubuhahirane, haba hagati y’u Rwanda n’ibindi bihugu, ndetse no hagati y’Abanyarwanda ubwabo, mu rwego rwo gukomeza kwihuta mu iterambere.

Gukora, kwagura no gusana imihanda biri muri gahunda ya Guverinoma y’u Rwanda, hagamijwe koroshya imigenderanire no guhahirana

TANGA IGITEKEREZO

Leave a Reply

Your email address will not be published. Required fields are marked *