20°C , Mostly cloudy | Kigali-Rwanda

2007-2017: Aho u Rwanda rugeze mu rwego rw’amashanyarazi

Yanditswe na admin

Ku ya Jan 3, 2018 saa 11:35

Impinduka mu kongera ingufu z’amashanyarazi no kuyakwiza mu gihugu zabaye kuva mu mwaka wa 2007 zigaragarira mu nzego zinyuranye uhereye ku bikorwa remezo byubatswe n’uburyo ahenshi mu gihugu amasaha yo gukora yiyongereye kubera hahora hacaniwe.

Uruganda rwa Gishoma rutunganya Megawatt 15 muri Nyiramugengeri

Ikigo cy‘Igihugu gishinzwe Ingufu (REG Ltd) gihamya ko mu myaka 10 ishize u Rwanda rwateye imbere mu rwego rw’amashanyarazi ndetse ubu  gusaranganya amashanyarazi kubera ubuke bwayo bikaba bitagikorwa kuko ingufu z’amashanyarazi zatunganywaga zavuye kuri Megawatt 64 zigera ku zisaga 210.

Eng Theoneste Higaniro, Umuyobozi w’Ishami rishinzwe imishinga yo gushaka ingufu z’amashanyarazi mu kigo gishinzwe guteza imbere ingufu (EDCL), yashimangiye ko kuba ingano y’ingufu yarikubye inshuro eshatu byatanze umusaruro watumye gukupira agace kamwe ugacanira akandi biba amateka.

Yagize ati “Kuva mu 2007 kugeza ubu igihugu cyateye imbere mu rwego rw’amashanyarazi kuburyo tutagisaranganya amashanyarazi mu duce dutandukanye. Icyo gihe na mbere yaho twakoraga isaranganya  bitewe n’igihe, ariko ubu ingano y’amashanyarazi dufite irahagije ku bantu bafite umuriro.”

Ibura ry’amashanyarazi rikigaragara riterwa n’iyangirika ry’ibikorwa remezo n’igihe birimo gusanwa no kwagurwa, ariko ngo ntabwo aba ari ingufu zidahagije.

Ku ngano y’ingufu zimaze kuboneka, abamaze kugezwaho ibikorwa remezo mu gihugu bakoresha Megawatt ziri hagati ya 130 – 140  gusa.

Eng Higaniro ashimangira ko bakomeje gukorana n’izindi nzego mu kongera umubare w’abagerwaho n’amashanyarazi mu gihugu. “[…]Leta ikomeje gushora imari mu bikorwa remezo bikwiza amashanyarazi mu gihugu hose kandi iyo ageze mu baturage haboneka n’abayakoresha. Kugeza ubu hari abaturage bakeneye amashanyarazi ariko atarabageraho kandi ahari akaba aribyo Leta ishyizemo ingufu cyane muri iyi myaka.”

Amashanyarazi ntagituruka ku ngomero gusa

Eng. Higaniro ashimangira ko imishinga minini yafashije kugera kuri MW 210 ishingiye kuri gahunda ya Guverinoma y’u Rwanda yo kongera imvano z’ingufu hadashingiwe gusa ku zikomoka ku ngomero.

Gukwiza ibikorwa remezo bifata ingufu zituruka ku izuba bibonwamo igisubizo cyihuse

Mu myaka 10 ishinze ni bwo hubatswe Urugomero rwa Nyabarongo ya I rutanga Megawatt 28, Uruganda Gaz Methane rwa KivuWatt rutanga MW 26.4, urwa Giciye ya I rutanga Megawatt 4,urwa Giciye II rutanga Megawatt 4,urwa Rukarara ya I rutanga Megawatt 9.5, urwa Rukarara ya II rutanga Megawatt 2, uruganda rw’ingufu z’imirasire y’izuba rutanga Megawatt 8.5 n’urwa  Gishoma rutanga Megawatt 15 zivuye kuri Nyiramugengeri.

Ati “Guverinoma y’u Rwanda yabonye ko ingufu zava no muri Gaz Methane, Nyiramugengeri, ingufu zituruka ku izuba ndetse dukomeje gukora ubushakashatsi ku ngufu zituruka ku mashyuza. N’umushinga wa Kalisimbi ntabwo twawuretse n’ubu turacyakomeje kureba ku mikorere yawo n’uburyo ahandi amashyuza aboneka yabyazwa umuriro.”

Na none kandi u Rwanda runakorana n’ibihugu by’abaturanyi mu gufatanya imishinga minini yegereye ku mipaka no guhuza imirongo y’amashanyarazi.  Hari imiyoboro u Rwanda ruhuriraho na Repubulika Iharanira Demokarasi ya Congo (RDC), Uganda, Congo na Tanzania.

“[…] Urebye ku mipaka yose turahura mu bihugu by’abaturanyi ariko uwo ntitujya tuwubara kuko aba ari muke cyane (cross-border electrification).”

Mu myaka 5 u Rwanda rwiteze izindi Megawatt zirenga 200

Ubuyobozi bwa REG buratangaza ko nta kizahagarika intego yo gucanira Abanyarwanda bose mu gihe ibikorwa remezo byo gukwiza amashanyarazi bizaba bimaze kubakwa mu gihugu hose.

Eng Higaniro avuga ko imishinga iteganyijwe kurangira bitarenze mu 2024 izasiga u Rwanda rwungutse izindi Megawatt zirenga 200 zikaba zihagije ngo igihugu cyose gicanirwe.

Imwe muri iyo mishinga ni uwa Hakan wa Nyiramugengeri witezweho gutanga Megawatt 80, uwa Symbion wa Gaz Methane witezweho Megawatt 50, uwa Rusumo wa Megawatt 80 usangiwe n’u Rwanda, Burundi na Tanzania aho u Rwanda ruzabonaho Megawatt zirenga 27.

Hari n’umushinga wa Rusizi III witezweho Megawatt 145 zizagabanywa hagati y’u Rwanda Burundi na Repubulika iharanira Demokarasi ya Congo, n’izindi ngomero nto zizabasha gutanga Megawatt zigera muri 30.

Umushinga wa Nyabarongo ya II uzaba utanga amazi, amashanyarazi no kuhira na wo witezweho ko ku ruhande rw’amashanyarazi uzatanga Megawatt 120 zizaboneka mu byiciro; icyiciro cya mbere cyitezweho Megawatt 43.5 nawo ukaba uri gutegurwa ngo uzatangire mu bihe bya vuba.

Eng. Higaniro ati “ Ibindi byiciro bizakorwa bitewe n’umubare w’abazaba biteguye gukoresha ingufu zihari, kuko mu gihe zibonetse ntizikoreshwe haba hari igihombo kuri Guverinoma n’abashoramari. Dutegereje inyigo yerekana ingufu zikenewe mu gihugu kugira ngo tumenye ngo bitarenze mu mwaka wa 2030 tuzaba dukeneye amashanyarazi angana gutya.”

U Rwanda rurateganya gukomeza kurahura mu bihugu by’abaturanyi rukagera muri Kenya no muri Ethiopia ndetse iyubakwa ry’ibikorwa remezo byo gukurura amashanyarazi ku ruhande rw’u Rwanda riragenda neza.

Leta y’u Rwanda ikomeje gushyira ingufu mu gukwiza imiyoboro y’amashanyarazi mu gihugu (2)

Akomeza agira ati “Nta bwoba dufite bwo kugera ku ntego yo gukwiza amashanyarazi mu gihugu ku kigero cya 100% bitarenze mu mwaka wa 2024, harimo ingufu zizatangwa ku murongo w’igihugu n’izikusanywa ku ruhande.”

REG Ltd ifite gahunda yo kongera amashanyarazi ijyanishije no gukorana n’Ikigo cy’Igihugu cy’Iterambere (RDB) mu gushaka abashoramari bo gushinga inganda nini ziyakoresha hamwe no kwagura imiyoboro iyakwiza mu gihugu byihutirwa.

Buri munyarwanda azacanirwa nahindura imyumvire

Umugwaneza Clementine Umuhuzabikorwa w’Umushinga ushinzwe gukwirakwiza amashanyarazi mu gihugu (EARP) ukorera mu kigo gishinzwe guteza imbere ingufu (EDCL),  arasaba abaturage guhindura imyumvire ko umuriro bakeneye ari uturutse ku ipoto gusa.

Yashimangiye ko gahunda yo kugeza ingufu z’amashanyarazi ku bantu bose ishingiye ku kwitabaza izindi ngufu ziganjemo izikomoka ku mirasire y’izuba kuko byoroshye kuzikwiza mu baturage.

Ati “Kubaka umuyoboro w’amashanyarazi ubwabyo bimara hagati y’amezi 18 na 24 udashyizemo ayo gushaka ibikoresho na ba rwiyemezamirimo, mu gihe iyo ari ‘Panneau Solaire’ babigukorera bikarangira ako kanya.”

Abaturage benshi bakeneye umuriro muke cyane bashobora kubona kuri ‘Panneau Solaire’ ntoya ishoboka kuko baba bacana radiyo, gucomeka telefoni, itara n’ibindi, bityo  Guverinoma y’u Rwanda yiyemeje kongera umubare w’Abanyarwanda bahabwa umuriro udashamikiye ku muyoboro w’igihugu (off grid) kugira ngo bose bacane byihuse badategereje imiyoboro itinda kubakwa nubwo ari cyo cyerekezo.

Uruganda rucukura rukanayungurura Gaz Methane mu kiyaga cya Kivu

Imishinga yo gukwiza imiyoboro mu gihugu ifite abaterankunga ku buryo itanga icyizere ko izatanga umusaruro ufatika.

Muri yo harimo umushinga munini ukomeje gushyirwa mu bikorwa mu karere ka Gicumbi na Rulindo, Nyabihu na Ngororero, n’uri mu turere twa Rusizi, Karongi na Nyamasheke.

Undi ubarizwa mu mirenge itandukanye y’Akarere ka Ngoma, Kirehe, Rwamagana na Kayonza, n’ukorerwa mu karere ka Gisagara na Nyanza.

Mugwaneza akomeza avuga ko hari n’indi mishinga yo gukwirakwiza amashanyarazi bakorana n’uturere mu ngengo y’imari yatwo.

Imibare y’ubushakashatsi bwakozwe na REG yerekana ko ingo zigerwaho n’amashanyarazi zavuye ku 10% mu 2010 zigera kuri 41% mu Ukwakira 2017 ku buryo kugera ku ngo 100% bitarenze umwaka wa 2024 bitakiri inzozi.